Լեզվաբանի սպանված ամուսնու գործն ուղարկվել է դատարան

Հրապարակ-ի  տեղեկություններով՝ այս տարի, հունիսի 4-ին Երեւանի Նուբարաշենի խճուղում դաժանաբար սպանված Եղիշե Խաչատրյանի գործն ուղարկվել է դատարան։ Եղիշե Խաչատրյանի շահերը ներկայացնող փաստաբան Ինեսա Պետրոսյանը մեզ տեղեկացրեց, որ մեղադրական եզրակացությունն արդեն ուղարկվել է կողմերին։ Հիշեցնենք, որ դեկտեմբերի 7-ին մամուլի ասուլիս էին հրավիրել Եղիշե Խաչատրյանի կինը՝ լեզվաբան Փառանձեմ Մեյթիխանյանը եւ Ինեսա Պետրոսյանը, տեղեկացրել, որ գործով նախաքննությունն ավարտվել է։ Գործով ներգրավված է վեց մեղադրյալ, որոնցից հինգին մեղադրանք է առաջադրվել ՀՀ քրեական օրենսգրքի 104 հոդվածի 2-րդ մասի 7-րդ եւ 10-րդ կետերով (Դիտավորյալ սպանություն մի խումբ անձանց կողմից խուլիգանական դրդումներով) եւ 258 հոդվածի 3-րդ մասով (Խուլիգանություն)։ Նրանք են՝ Արտաշես Չիչոյանը, Խաչիկ Կոսյանը, Արարատ Նիկողոսյանը, Յուրի Հակոբյանը, Արթուր Զաքարյանը։ Մեկ հոգու էլ՝ Հարություն Գրիգորյանին, մեղադրանք է առաջադրվել ՀՀ քրեական օրենսգրքի 334-րդ հոդվածով (Հանցագործությունը պարտակելը)։