Դեռ պարզ չէ՝ ովքեր կլինեն նախագահի տեղակալները. ՀՀԿ-ն խորհրդի նիստ չի հրավիրի

Այսօր ՀՀԿ-ն ԳՄ նիստ է հրավիրելու, բայց խորհրդի նիստ այդպես էլ չի հրավիրելու։ ՀՀԿ կազմակերպչական հանձնաժողովի ղեկավար Ռուբեն Թադևոսյանը «Հայկական ժամանակ»-ի հետ զրույցում հայտնել է, որ խորհրդի ձևավորումը վերջնականապես ավարտելուց հետո նոր նիստ կհրավիրեն։ Հիշեցնենք, որ անցած շաբաթ ԱԺ փոխնախագահ Էդուարդ Շարմազանովը հայտարարել էր, թե մինչ տարեվերջ խորհրդի նիստ կհրավիրեն։ Ավելի վաղ Ռ. Թադևոսյանն էլ էր ասել, որ այդ նիստը մինչ տարեվերջ կհրավիրվի։ Երեկ արդեն անդրադառնալով այդ հարցին՝ նա չի բացառել, որ այդ նիստը ոչ թե մինչև տարեվերջ, այլ եկող տարվա սկզբին տեղի կունենա։ «Երբ խորհուրդը համալրենք, ձևավորումն ավարտենք, այդ ժամանակ էլ նիստ կանենք։ Մեր գրաֆիկը հո Նոր տարով, Ձմեռ պապով չի պայմանավորված», - ասել է նա։ Իսկ ՀՀԿ խորհրդի նիստի ինտրիգը Սերժ Սարգսյանի կուսակցական տեղակալների հարցն է, որտեղ Ռ. Թադևոսյանը չի բացառել, որ փոփոխություններ կլինեն։ Արդեն հայտնի է, որ առաջին տեղակալը լինելու է վարչապետ Կարեն Կարապետյանը։ Այս դեպքում թերևս ինտրիգը կարող է լինել Հովիկ Աբրահամյանի հարցը։ Հարցին՝ հնարավո՞ր է հրաժարականից հետո նա այլևս ՀՀԿ փոխնախագահ չդառնա, հատկապես, որ ԳՄ վերջին նիստին չի մասնակցել, Ռ. Թադևոսյանն ասել է. «Եկեք անուններով չասենք, դա նախագահի իրավունքն է։ Մեկ շաբաթ, թե երկու շաբաթ հետո կլինի, կտեղեկանանք»: