«Ուժեղ քաղաքական կամքն առկա է». Հասան Ռոուհանի
Այսօր Երևանում մեկնարկած Հայաստան-Իրան գործարար համաժողովին մասնակցեցին ՀՀ նախագահ Սերժ Սարգսյանն ու պաշտոնական այցով ՀՀ ժամանած Իրանի Իսլամական Հանրապետության նախագահ Հասան Ռոուհանին: Նախագահները փակեցին համաժողովը կարճ ելույթներով: ԻԻՀ նախագահ Հասան Ռոուհանին ասաց, որ իրանական պատվիրակությունը հյուրընկալվել է բարձր մշակույթ ունեցող և բարեկամ Երևանում և ՀՀ կառավարությանը: «Իրանահայերի գոյությունն Իրանում համարվում է շատ ուժեղ կապող օղակ Հայաստանի և Իրանի միջև, և մենք պետք է այդ հնարավորությունները լավագույնս օգտագործենք, դա անելու համար երկու կառավարությունները պետք է կարողանան ապահովել համապատասխան պայմաններ երկու երկրների առևտրականների և գործարարների, տնտեսական ոլորտի ձեռներեցների համար: Հավանական խոչընդոտները պետք վերացվեն: Առաջին կարևոր հանգամանքն այն է, որ ուժեղ կամքն ԻԻՀ-ի և ՀՀ-ի իշխանությունների մոտ առկա է և այդ կամքը չափազանց կարևոր է, երբ բարձր մակարդակում հաստատակամ լինենք և կամք ունենանք, ավելի հեշտ հնարավոր կլինի խնդիրները և հավանական խոչընդոտները վերացնել: Ես նախագահի հետ հանդիպման և ասուլիսի ժամանակ այդ կամքը լավագույնս նկատեցի, ՀՀ իշխանությունները ցանկություն ունեն զարգացնելու հարաբերությունները: Կարևոր քայլ կատարվեց՝ ոչ արտոնագրային ռեժիմի սահմանումն էր: Տուրիզմի մասին նշեց պարոն նախագահը, դա ոլորտներից միայն մեկն է, երբ ոչ արտոնագրային ռեժիմ է անհրաժեշտ, դա սահմանվում է առևտրային նպատակներով, գիտական, ժամանցի, կրթության նպատակներով, հեշտությամբ կարող են փոխայցելություններ լինել: Այսօր պարոն վարչապետն ասում էր, որ այնպես պետք է անենք, որ էժան օդանավով կարողանանք երկու երկրների միջև կապ հաստատել, որպեսզի մարդիկ չնչին ծախսերով փոխայցելություններ կատարեն, հետո էլ անհրաժեշտ կլինի էժան հյուրանոց: Ամեն դեպքում, ճիշտ է այն խոսքը, որ մենք պետք է օգտագործենք եղած հնարավորություններն ի շահ երկու երկրների: Չափազանց ուրախ եմ, որ ինձ ասացին, որ այսօրվանից Մեղրիի և Ագարակի բնակիչները կարող են իրանական գազ օգտագործել, և այսօրվանից գազն արդեն բոցավառվեց այդ երկու քաղաքներում: Սա նշանակում է, որ ականատեսն ենք ներդրված ջանքերի արդյունքին, գազը կարող է նպաստել ՀՀ-ի զարգացմանը, և, ինչպես ժողովրդի սրտերն են ջերմ, մարդկանց տներն էլ կջերմանան»,- ասաց Ռոուհանին:
Հետևեք մեզ Viber-ում
