Միգրացիայի նվազում է տեղի է ունեցել երկու գործոնների շնորհիվ.Ռուբեն Եգանյան

« Վերջին հետազոտության արդյունքներով՝ միգրացիոն գործընթացներում այս կամ այն ձևով ներառված են կամ արտերկրում գտնվող անդամներ ունեն տնային տնտեսությունների միայն 31.6 տոկոսը՝ 2015 թվականի մոտավորապես 34 տոկոսի դիմաց: Նվազել է նաև միգրացիոն գործընթացներում բնակչության ներառվածության մակարդակը՝ մոտավորապես ութ տոկոսով, գուցե մի քիչ ավելի»,-Հայելի ակումբում հրավիրված ասուլիսում հայտարարեց Ժողովրդագիր Ռուբեն Եգանյանը: «Միգրացիայի նվազում է տեղի է ունեցել երկու գործոնների շնորհիվ, առաջինը՝ վերադարձած միգրանտների թվերի աճով, և երկրորդ՝ նվազել է արտերկրում գտնվող միգրանտների թիվը:Սա պայմանավորված է բացառապես աշխատանքային միգրացիոն գործընթացների փոփոխություններով, որն իր հերթին հետևանք է Ռուսաստանում իրավիճակի փոփոխության, քանի որ նվազել են աշխատատեղերը և վաստակների մեծությունը, և դրանով պայմանավորված՝ աճել է վերադարձողների թվերը»,-ասաց Եգանյանը և հավելեց,որ  պակասել է արտերկրից դրամական մուտքեր ունեցողների թիվը: «Եթե 2015 թվականին այն կազմել էր մոտավորապես 23 տոկոս, այս տարի՝ 22 տոկոս: Եթե 2015 թվականի տվյալներով մեկ տարվա ընթացքում տնային տնտեսությունների ստացած գումարը կազմել է 240 միլիոնից ավելի, ապա այս հետազոտության տվյալներով՝ 2016 թվականին կազմել է ընդամենը 201 միլիոն, այսինքն` տնային տնտեսությունների տնտեսական վիճակը վատացել է»-ասաց նա: Ըստ նրա՝ եթե Ռուսաստանում շարունակվի իրավիճակի վատթարացումը, կմեծանա վերադարձողների թիվը, կնվազի մեկնողների թիվը: Ռուբեն Եգանյանն ասաց, որ ձեռնունայն վերադառնալուց հետո, երբ մարդ ցանկանում է նորից գնալ, դա միայն այլընտրանք չունենալու պատճառով է: