Պուտինը և Էրդողանը շատ ռիսկային խաղ են խաղում. Sueddeutsche Zeitung
Sueddeutsche Zeitung գերմանական թերթի սյունակագիր Շտեֆան Կորնելիուսը գրում է,որ Թուրքիայում ռուս դեսպանի սպանությունը չի դառնա կարևոր քաղաքական գործոն, սակայն Պուտինի և Էրդողանի խաղաղասիրությունը խաբուսիկ է՝ «Եթե Անդրեյ Կարլովին սպանած անձը այդ հանցագործությունը կատարեր թուրքական ռազմաօդային ուժերի կողմից ռուսական ինքնաթիռի կործանումից անիջապես հետո, հետևանքները անկանխատեսելի կլինեին։ Չնայած մեր ժամանակներում դեսպանի սպանությունը հավասարազոր չէ պետության վրա հարձակմանը, սակայն այն կարող է լուրջ հակամարտություն առաջացնել:Այս տարի ռուս-թուրքական հարաբերությունները տպավորիչ կերպով փոխվել են։ Սակայն «Կարլովի սպանությունից հետո Ռուսաստանին և Թուրքիային կապում է ոչ թե ողջամտությունը, այլ սեփական շահերը»»,- կարծում է հեղինակը։ Թուրքիան հետաքրքրված է Սիրիայի տարածքում քրդական ազդեցության նվազեցմամբ և եթե չի հաջողվում տապալել Բաշար Ալ-Ասադի վարչակարգը, ապա գոնե անհրաժեշտ է կանխել քրդերի առաջխաղացումը,որում Թուրքիային կարող է օգնել Ռուսաստանը։ Պուտինի շահն իր հերթին այն է, որ Սիրիայում քաղաքացիական պատերազմն ընթանա իր և Ասադի պայմաններով, ինչի համար Թուրքիան անհրաժեշտ է ոչ թե որպես հակառակորդ, այլ որպես կայունացնող գործոն սահմանի վրա։ Անկարայում Կարլովի սպանությունը խոչընդոտում է այս փոխզիջմանը, այդ պատճառով «այն չպետք է դառնա քաղաքական կարևոր գործոն, առավել ևս՝ չի դառնա ռազմական առճակատման պատճառ»՝ գրում է Կորնելիուսը։ Վերջին իրադարձությունները ցույց են տալիս, որ որոշ չափով վտանգավոր է ստեղծված իրավիճակը։ Եթե մի քանի օր առաջ Հալեպը չանցներ սիրիական կառավարական զորքերի վերահսկողության տակ, Ռուսաստանը դժվար թե փոխհամաձայնության գար Իրանի և Թուրքիայի հետ՝ «սիրիական կարկանդակը» կիսելու հարցում, և դեսպանի սպանությունը կներկայացվեր այլ լույսի ներքո։ Ռուսաստանը և Թուրքիան տարածաշրջանում խաղում են շատ մեծ ռիսկով։ Քանի որ Հալեպի գրավումը չի նշանակում պատերազմի ավարտ, քրդերը չեն ցանկանում հրաժարվել իրենց ինքնավարության հավակնությունից, իսկ Իրանը շարունակում է մնալ անկանխատեսելի դաշնակից:
Հետևեք մեզ Viber-ում
