Արտակարգ իրավիճակ Երևանում

Այսօր՝ դեկտեմբերի 19-ին, արտակարգ իրավիճակ է ստեղծվել Երևան քաղաքի Կենտրոն վարչական շրջանի Վ. Թոթովենցի անվան թիվ 57 հիմնական դպրոցի մոտ: Ինչպես հայտնում է ֆոտոլրագրող Գագիկ Շամշյանը, դպրոցին հարակից ճանապարահատվածը, որտեղով նաև երեխաներն են գնում գալիս, վերածվել էր սահադաշտի, տեղի էր ունեցել ավտովթար, իսկ նկարահանման ժամանակ նաև երեխաներ սայթաքեցին և , բարեբախտաբար, լուրջ վնասվածքներ չստացան: Արագածոտնի մարզի Արտենի գյուղի բնակիչ Մխիթար Գալոյանը, չիմանալով ճանապարհի մերկասառույցի մասին՝ Nissan մակնիշի 34 CT 007 համարանիշի ավտոմեքենայով փորձել էր բարձրանալ, սակայն մեքենան սահել և բախվել էր ВАЗ 2106 մակնիշի 35 UP 973 համարանիշի ավտոմեքենային: SHAMSHYAN.com-ի հետ զրույցում վարորդը ասում էր, որ ԱՊՊԱ-ն հրաժարվել է վնասը փոխհատուցել, իսկ ինքը չգիտի անգամ, թե ո՞վ է վնասը փոխհատուցելու, կամ արդյո՞ք ինքը մեղավորություն ունի: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: