Որն է լինելու Սերժ Սարգսյանի պատասխանը

Նախագահի աշխատակազմի ղեկավարի նախկին տեղակալ Վիկտոր Դալլաքյանի նախահամագումարյան ասուլիսը լույս սփռեց քաղաքական վերջին ժամանակների ինտրիգներից մեկի վրա։ Արդեն հաստատ է՝ Պաշտպանության նախկին նախարար Սեյրան Օհանյանը առաջիկայում մուտք կգործի քաղաքական դաշտ։ Դալլաքյանն ասաց, որ առաջիկա օրերին Օհանյանը հայտարարություն կանի եւ կազդարարի քաղաքականություն մտնելու մասին։ Վիկտոր Դալլաքյանը հայտարարեց նաեւ, որ գործող իշխանությունները պետք է հեռացվեն, քանի որ վերջինիս վերարտադրությունն ամենավտանգավորն է, իսկ ամենաուշագրավը, նա ընդգծեց, որ իր եւ Սեյրան Օհանյանի տեսակետները համընկնում են երկրում ստեղծված իրավիճակի վերաբերյալ․« Հայաստանում պետք է իրականացվի խաղաղ եւ անցնցում իշխանափոխություն, եւ գալիք խորհրդարանական ընտրությունները դրա համար լավ հնարավորություն են ստեղծում: Ընդ որում, պետք է անցում կատարել երկպալատ խորհրդարանի մոդելին՝ սփյուռքի լայն ներկայացվածությամբ»։ Դալլաքյանը հայտարարեց, որ կողմ է լայն կոնսոլիդացիային եւ առաջիկայում հրապարակայնորեն կանդրադառնա, թե որ ուժերի հետ է հանդիպել․« Հրաժարականից հետո բազմաթիվ հանդիպումներ եմ ունեցել նաեւ Պաշտպանության նախկին նախարար Սեյրան Օհանյանի հետ: Մենք նույն կերպ ենք գնահատում Հայաստանում առկա իրավիճակը եւ այդ իրավիճակից դուրս գալու ուղիները: Սեյրան Օհանյանը մոտ օրերս հանդես կգա քաղաքականություն մուտք գործելու վերաբերյալ հայտարարությամբ: Մենք նրա հետ համագործակցելու ենք »,- շեշտեց Դալլաքյանը։ Դալլաքյանը ասաց նաեւ, որ եթե գալիք խորհրդարանական ընտրություններն էլ կեղծվեն, ապա հանրությանը այլ բան չի մնա, քան Սասնա ծռերի օրինակով ապստամբությունը․«Եթե գալիք ԱԺ ընտրությունները եւս կեղծվեն, բողոքի այլ տարբերակ չի լինի, քան նմանօրինակ բողոքը: Երբ ժողովրդին մղում են փակուղի, նա այսպիսի քայլերի է դիմում»։ Այսպիսով, Սեյրան Օհանյանը իշխանությունից ընդդիմություն տրանսֆորմացիայի փուլն անցավ՝ զբաղեցնելով ընդդիմության ճամբարը։ Եթե Սեյրան Օհանյանի ընդդիմադիր դաշտը գրավելու մտադրությունները լուրջ են, ապա իշխանության՝ կոմպրոմատների փաթեթը չի ուշանա, որի պարագայում խիստ կասկածելի է՝ Սեյրան Օհանյանը կցանկանա՞ մուտք գործել քաղաքականություն, թե կմտքափոխվի։ Մյուս կողմից՝ այս նախագիծը շահեկան կարող է լինել առաջին հերթին իշխանության համար, քանի որ եւ Վիկտոր Դալլաքյանը եւ Սեյրան Օհանյանը Սերժ Սարգսյանի թիմում են եղել ու կարող են չափավոր ընդդիմություն հանդես գալ։ Թերեւս միայն այդ պարագայում է հնարավոր գործունեություն ծավալել, այլապես նույն փաստարկով նրանք առավել խոցելի են։ Անի Սահակյան