Որոշողը Ռիտա Սարգսյանն է. Հրապարակ
Հրապարակ թերթը գրում է. «Տեղեկություններ կան, որ ՀՀԿ կանանց ցուցակագրման հարցում բավականին վճռորոշ է առաջին տիկին Ռիտա Սարգսյանի կարծիքը։ Քաղաքական շրջանակներում խոսվում է, որ նա է որոշում, թե ցուցակի որ տեղում ում գրեն, եւ, առհասարակ, բավականին ակտիվ կուրացիա է անում ՀՀԿ-ական կանանց՝ երբեմն միջամտելով այնպիսի մասնավոր հարցերի, ինչպիսիք, ասենք, որեւէ միջոցառման «դրես-կոդն» է։Նույն աղբյուրները պատմում են, որ Ռիտա Սարգսյանն ամուսնու օրինակով ձգում է ինտրիգը՝ սպասողական դրության մեջ պահելով տիկնանց։ Միայն հստակություն կա Հերմինե Նաղդալյանի եւ Արփինե Հովհաննիսյանի հարցում, որոնք կլինեն հաջորդ խորհրդարանում։ Նրա մասնակցությամբ էլ կարծես օրակարգից դուրս է եկել «168 ժամ» թերթի խմբագիր Սաթիկ Սեյրանյանի պատգամավոր դառնալու հարցը, քանի որ օրեր առաջ Արյունաբանության կենտրոնի բացման տեսանյութն իրականացվել եւ առանց մոնտաժման տեղադրվել է «168 ժամի» լրագրողի կողմից, ինչը հարուցել է առաջին տիկնոջ զայրույթը։ Ի դեպ, Ս․ Սեյրանյանն օրերս անդամագրվել է Ժուռնալիստների միությանը, ինչը կրկին ակտիվացրել է նրա՝ միության նախագահ դառնալու մասին լուրերը։ Երեկ մենք միության նախագահ Աստղիկ Գեւորգյանին հարցրինք՝ փաստորեն, Ձեզ փոխարինո՞ղ են պատրաստում։ «Դա իմ խնդիրը չէ, համագումարն է որոշելու», պատասխանեց նա։
Հետևեք մեզ Viber-ում
