«Սուրբ Աստվածամայր» հիվանդանոցում 2 տարեկան երեխա է մահացել
Դեկտեմբերի 4-ին Երեւանի «Սուրբ Աստվածամայր» հիվանդանոցում 2 տարեկան երեխա է մահացել: Ըստ նախնական տեղեկության երեխան ընդունվել է հիվանդանոց ծանր վիճակում` թոքային դեստրուկցիա դիագնոզով շնչառական անբավարարվածություն երրորդ աստիճանով եւ փրկել չէր հաջողվել: Օրաթերթին տեղեկություններ հասան այն մասին, որ «Սուրբ Աստվածամայր» կենտրոնի տնօրեն Նիկոլայ Դալլաքյանը մասնավոր զրույցներում հայտարարել է, թե արժանի հակահարված է տվել լրատվամիջոցներից մեկին: Բանն այն է, որ լրատվամիջոցների որոշ հրապարակումների համաձայն բժշկական կենտրոնի աշխատակիցներից ասել են, թե երեխայի մահն իրենց համար սովորական երեւույթ է: Հասկանալու համար ինչ հակահարվածի մասին է խոսքը` «ժողովուրդ»-ը կապ հաստատեց Նիկոլայ Դալլաքյանի հետ: Վերջինս, լսելով հարցը, կտրուկ պատասխանեց. «Ի՞նչ հայտարարություն: Ընդամենը «Այսօր» կայքում էր հրապարակում եղել, ես էլ հայտարարություն էի տարածել, թե ինչպես է եղել, նրանք դա էլ են հրապարակել, այդքան բան»: Ի դեպ, օրաթերթը տեղեկացավ որ Նիկոլայ Դալլաքյանի տնօրինած ԲԿ-ում աշխատում են նրա ազգականները: Մասնավորապես նրա որդին Դավիթ Դալլաքյանը, ԲԿ-ի մանկական կրծքային վիրաբուժության բաժանմունքի վարիչն է, քրոջ կամ եղբոր որդին մեկ այլ բաժանմունքի վարիչ է: Այս փաստի հետ կապված մեկնաբանություն տնօրենից ստանալ չհաջողվեց: Հարցը չլսած` Նիկոլայ Դալլաքյանն անջատեց հեռախոսը: Օրվա մյուս հրապարակումներին ծանոթացեք թերթի այս համարում:
Հետևեք մեզ Viber-ում
