«Նպաստների մասին» օրենքում նոր կարգ է սահմանվել. նախարար

Այսօր Ազգային ժողովի արտահերթ նիստում քննարկվում է «Պետական նպաստների մասին» Հայաստանի Հանրապետության օրենքում փոփոխություններ և լրացումներ կատարելու մասին օրենքի նախագիծն առաջին ընթերցմամբ ընդունելու մասին հարցը։ Նախագծի հիմնական զեկուցող, ՀՀ սոցիալական հարցերի նախարար Արտեմ Ասատրյանը նշեց, որ սոցիալական աջակցության բնագավառում ՀՀ-ի կառավարության լիազորած պետական կառավարման մարմինները քաղաքացիական կացության ակտերը գրանցող մարմիններից  ստանում են քաղաքացիական կացության ակտի պետական գրանցման վերաբերյալ տեղեկություններ: Այնուհետև հայտնեց, որ առաջարկվում է նաև ընտանեկան դրամագլուխը տնօրինելու պայմաններն ու կարգը որոշակիորեն ավելի առարկայական կարգավորել օրենքով: «Այս նախագծով անդրադարձ է կատարվում նաև օտարերկրյա քաղաքացիների մասով նպաստների իրավունքի որոշակի դրույթներին, մասնավորապես առաջարկվում է նախատեսել, որ ՀՀ-ում առնվազն երեք տարի անընդմեջ հաշվառված լինելու դեպքում է այդ նպաստների իրավունքը ծագում։ Նախագծի նպատակն է՝ բարելավել քաղաքացիներին մատուցվող ծառայությունների որակը՝ իրավակիրառական պրակտիկայում առաջացած խնդիրներին լուծում տալու և տեղեկատվական համակարգերն առավել առարկայական կիրառելու միջոցով: Խոսքը վերաբերում է նաև չաշխատող մարդկանց մայրության նպաստին և երեխայի ծնունդի միանվագ նպաստին»,- նշեց նախարարը։ Ա. Ասատրյանը նաև նշեց, որ վճարվող նպաստի գումարները  կարող են հետ գանձվել ոչ միայն քաղաքացիներից, այլ նաև  համապատասխան որոշում կայացրած  աշխատակցից, ում մեղքով, գործողությունների կամ անգործության արդյունքում վճարվել են նպաստի գումարները։