Արմեն Աշոտյանի ակնարկը
ՀՀԿ անդամ Արմեն Աշոտյանը իր ֆեյսբուքյան էջում գրել է. «Ձմեռը սիրում եմ բացառապես մեկ բանի համար:Օջախդ ավելի ջերմ ու ձգող է դառնում: Տան շեմից այն կողմ վրայիցդ թոթափում ես ձյան մնացորդները, սրբիչով չորացնում գլուխդ (իմ դեպքում), պատկերացնում, թե հիմա ոնց կուտեիր տնական մուրաբայի մի ողջ ափսե, հետո հիշում այդ չարաբաստիկ կալորիաների մասին ու բավարարվում տնեցիքի դրած դառը սուրճով:Նստում բազմոցին, մի ծածկոց գցում վրադ, որը որքան հին, այնքան ջերմացնող, խաղաղացնող ու քոնը: Վերցնում ես "պուլտը" ու երբ փորձում ես փոխել ալիքները, երեխաներիդ խնդրող-պնդող-ծակող-կտրող հայացքներից հասկանում, որ ավելի լավ է չմտնել տեղեկատվական պատերազմի մեջ նոր սերնդի հետ ու լուռ հետևել, թե հերթական անիմաստ անիմացիոն զավեշտը երբ է ավարտվելու:Այդ պահին հասկանում ես, որ տղերքդ մեծացել են ու մասնակի իշխանափոխություն իրականացրել: Բազմոցի վրա քո սիրած տեղը դեռ քոնն է, բայց հեռուստացույցի "պուլտը"՝ արդեն չէ...»: Այս ֆոնին նշենք, որ ՀՀԿ-ն իսկապես հետաքրքիր գարուն է ունենալու, երբ ձյունն ու սառույցը հալվեն, ինչ է պարզվելու` ով է բազմոցին, իսկ ում ձեռքին է «պուլտը»: Հետևությունները թողնում ենք ընթերցողին:
Հետևեք մեզ Viber-ում
