Արաս Օզբիլիսը կազատվի պարտադիր զինվորական ծառայությունից

Կառավարության նիստի օրակարգում ընդգրկված է Հայաստանի ֆուտբոլի ազգային հավաքական թիմի ֆուտբոլիստ Արաս Իհսանի Օզբիլիզին պարտադիր զինվորական ծառայությունից ազատելու հարցը:

Որոշման նախագծի ընդունումը պայմանավորված է ֆուտբոլի 2018 թվականի աշխարհի առաջնության ընտրական փուլերին Հայաստանի ֆուտբոլի ազգային հավաքական թիմի առաջատար ֆուտբոլիստ Արաս Իհսանի Օզբիլիզի մասնակցությունն ապահովելու անհրաժեշտությամբ։

«Արաս Իհսանի Օզբիլիզը հանդես է գալիս ֆուտբոլի Հայաստանի Հանրապետության հավաքական թիմում, աչքի է ընկնում արդյունավետ խաղով, և Հայաստանի Հանրապետության սպորտի և երիտասարդության հարցերի նախարարությունը կարևորում է նրա մասնակցությունը ֆուտբոլի հավաքական թիմի սպասվելիք խաղերին։ Հայաստանի Հանրապետության կառավարության 2015 թվականի նոյեմբերի 26-ի № 1372 Ա որոշմամբ Արաս Իհսանի Օզբիլիզին պարտադիր զինվորական ծառայության զորակոչից տարկետում էր տրվել մինչև 2016 թվականի ձմեռային զորակոչը: Քանի որ Արաս Իհսանի Օզբիլիզի 27 տարին լրանում է 2017 թվականի մարտի 9-ին, հնարավոր չէ նրան պարտադիր զինվորական ծառայության զորակոչից տարկետում տալ կամ երկարաձգել տարկետման ժամկետը։ Հետևաբար անհրաժեշտություն է առաջացել ազատել նրան պարտադիր զինվորական ծառայությունից», - նշված է որոշման նախագծում: