ՀՀԿ-ական պատգամավորը «խորն» է մտածում
«Մեզ մոտ դեկտեմբերին միշտ գները բարձրանում են և դա օրինաչափ է, քանի որ դեկտեմբերին սպառումը շատանում է, հետևաբար գներն էլ բարձրանում են: Այլ երկրներում սպառումը շատանում է, գինը նվազում է, բայց մեր երկրում դեկտեմբերին է միայն սպառումը շատանում, իսկ մնացած 11 ամիսներին սպառումը քիչ է: Այսինքն դեկտեմբերի սպառումը մյուս ամիսների համեմատ համաչափ չէ»,-ԱԺ ՀՀԿ խմբակցության պատգամավոր, սոցիալական հարցերի հանձնաժողովի նախագահ Հակոբ Հակոբյանն այսօր խորհրդարանում լրագրողների հետ զրույցի ժամանակ անդրադարձավ դեկտեմբեր ամսվա ընթացքում հայկական շուկայում մթերքների գների աճին: Հակոբյանի խոսքով, եթե ՀՀ-ում լիներ մի մարմին, որ կարող էր կարգավորել գները, ապա գները կիջնեին մեզ մոտ էլ, սակայն մենք նման մարմին չունենք և մեր շուկայական հարաբերությունների գործընթացքում գինը կարգավորվում է շուկայի թելադրանքով, ուստի ըստ նրա՝ դա էլ է բերում գների բարձրացման: Հակոբյանը նշեց, որ միշտ էլ այդպես է եղել. Նոր տարին լրացուցիչ ծախսեր է պահանջում: «Թոշակներն ու աշխատավարձերը չեն բարձրանում, բայց ապրանքների գները բարձրանում են Նոր տարվա շեմին, դա միշտ այդպես է եղել, Նոր տարին լրացուցիչ ծախսեր է պահանջում, միայն մեզ մոտ չէ, դա բոլոր տեղերում էլ այդպես է»,- հայտարարեց պատգամավորը:
Հետևեք մեզ Viber-ում
