Որ բոլորդ սուրբ եք, եկեղեցու խաչն ո՞վ գողացավ. Նաիրա Զոհրաբյանը՝ Արփինե Հովհաննիսյանին
ԱԺ արտահերթ նիստում «Քրեական օրենսգրքում» փոփոխություններ կատարելու մասին նախագծի քննարկմանը ԲՀԿ խմբակցության ղեկավար Նաիրա Զոհրաբյանը հայտարարեց. «Նախագիծը լավն է, սակայն մեր երկրում դժվար թե գործի: Շատ հատուկենտ երկրներում է այն գործել: Նույն Իտալիայում Բեռլուսկոնիի հարցը չքննարկվեց: Քննարկում եղավ, երբ նա քաղաքականապես անպետք էր: Իսկ մեր բոլոր պաշտոնյաների հայտարարագրերում հիմնական թրենդը փոխառություններն են՝ բոլորը տոկոսով փող տվող են: Մինչդեռ պաշտոնյան իրավունք չպետք է ունենար փոխառություններ տալ՝ ինքը լոմբարդի աշխատո՞ղ է, թե՞ վաշխառու, թող գնա այդ դեպքում տոկոսով փող տվող լինի չենջերում: Ում հարցնում ես, բոլորը հալալ քրտինքով հարստացած են, այսքան հալալ քրտինքով հարստացածներ մեր երկրում որտեղի՞ց, դա չենք կարողանում պարզել: Այդպես չի լինում: Հիշեցի այն հայտնի անեկդոտը՝ այդ, որ բոլորդ սուրբ եք, եկեղեցու խաչն ո՞վ գողացավ»: Ի պատասխան Արդարադատության նախարար Արփինե Հովհաննիսյանն արձագանքեց. «Համամիտ եմ, որ դա խնդիր է՝ տոկոսով փող տալը: Սա կոչվում է հետեւանքային հանցակազմ: Այս նախագիծը լրացուցիչ գործիք է՝ այդ փոխկապակցված շղթան փակելու: Քանի որ փոխառությունների տակ ներառված են նաեւ նվիրատվությունները, ավանդները, ապա շատ դժվար է ստուգել՝ որն է ապօրինի եկամուտների կուտակումը»:
Հետևեք մեզ Viber-ում
