Որն է լինելու ապօրինի հարստացման հանցակազմի սանկցիան

Ազգային ժողովն արտահերթ նիստում սկսել է քննարկել ապօրինի հարստացման մասին օրենսդրությունը: Կառավարությունը լրացումներ է կատարել Քրեական օրենսգրքում և Քրեական դատավարության մասին օրենսգրքում:Արդարադատության նախարար Արփինե Հովհաննիսյանը ներկայացրեց նախագիծը՝ նշելով, որ ՄԱԿ-ի կոռուպցիայի դեմ կոնվենցիային համահունչ են կատարվել Քրեական օրենսգրքի այս լրացումները: «Խոսքը գնում է էական չափի մասին, միջազգային փորձը ցույց է տալիս, որ բոլոր դեպքերում խոսքը գնում է նվազագույն աշխատավարձի շեմը գերազանցող կամ միջինացված որոշակի գումարի մասին, որի համար հետևյալ հիմնավորումն է բերվում՝ իրավապահ մարմինները չպետք է իրենց ջանքերը փոշիացնան մանր խախտումների հետևից գնալով: Դրա համար միշտ սահմանվում է որոշակի էական չափ: ՀՀ-ում մենք դա սահմանել ենք հայտարարագիր ներկայացնող ամենաբարձր և ամենաստորին պաշտոնը զբաղեցնողների աշխատավարձի միջին թվաքանակը՝ վեց ամսվա կտրվածքով»,- մանրամասնեց Արփինե Հովհաննիսյանը: Հաջորդ հարցը ապօրինի հարստացման հանցակազմի սուբյեկտն է՝ այս լրացումներով կառավարությունն ապօրինի հանցակազմի սուբյեկտ համարել է պաշտոնատար անձին կամ այն անձին, ով ՀՀ օրենսդրության համաձայն հայտարարագիր է ներկայացնում: «Նրանք այս պահին պաշտոնատար անձինք են և նրանց փոխկապակցված անձինք, որոնց շրջանակի ընդլայնման վերաբերյալ ևս մենք օրենսդրական նախաձեռնություն ունենք»,- ասաց նա: