Հարկային պարտավորությունը տնտեսվարող սուբյեկտներին չի խոչընդոտի լուծարվել

Դեկտեմբերի 8-ին ՀՀ կառավարության հավանությանն արժանացած օրենքների նախագծերի փաթեթով մի շարք հարկային արտոնություններ են առաջարկվում բիզնեսին: Մասնավորապես, «Ինքնազբաղված անձանց հարկային արտոնությունների մասին» ՀՀ օրենքի նախագծով նախատեսվում է գործունեության կոնկրետ սահմանված տեսակներով ինքնազբաղված անձանց ազատել հարկումից: «Տարեկան մինչև 9 միլիոն դրամ շրջանառություն ունեցող և վարձու աշխատողներ չունեցող շուրջ 1570 ինքնազբաղված անձինք կազատվեն հարկերի վճարումից, իսկ արտոնության գումարը կկազմի շուրջ 400 միլիոն դրամ»,- այս մասին հայտարարեց ՀՀ ԿԱ ՊԵԿ նախագահի տեղակալ Վախթանգ Միրումյանը: Ինչպես տեղեկացրեց՝  Հարկային արտոնությունների փաթեթի նախագծով առաջարկվում է փաստացի գործունեություն չիրականացնող, գույք և հարկային պարտավորություններ չունեցող հարկ վճարողներին պարզեցված ընթացակարգով լուծարվելու հնարավորություն տալ: «Շատ էին դեպքերը, երբ տնտեսվարող սուբյեկտներն ունեին փոքր մեծության հարկային պարտավորություններ: Նրանք 2 կամ 3 հազար դրամի համար չէին լուծարվել, և դրա արդյունքում նվազագույն հարկեր էին առաջադրվել, իսկ պարտավորությունները հասել էին բավականին էական  գումարի: Դրա համար այս նոր նախաձեռնությամբ սահմանում ենք, որ մինչև 10 հազար դրամ հարկային պարտավորությունների մեծությունն անտեսվելու է», ասաց Վախթանգ Միրումյանը: Փաթեթով առաջարկվում է կիրառել նաև հարկային համաներում՝ մինչև 2012թ. դեկտեմբերի 31-ը եկամտահարկի և պարտադիր սոցիալական ապահովագրության վճարների նվազագույն գումարների վճարման պարտավորություններ ունեցող անհատ ձեռնարկատերերին ազատելով այդ գումարների վճարումից: Ըստ Վախթանգ Միրումյանի, ընդհանուր առմամբ այս փաթեթից օգտվողների թիվը կկազմի շուրջ 15 հազար, իսկ եկամտային ազդեցությունը կարող է հասնել մինչև 6 միլիարդ դրամի: