Բագրատյանը զգուշացնում է
Ազգային ժողովում մեկնարկել է արտահերթ նիստը, որի օրակարգում է նաև «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքի նախագիծը երկրորդ ընթերցմամբ ընդունելու մասին հարցը։ ՀՀ պաշտպանության նախարար Վիգեն Սարգսյանը ներկայացրեց մի շարք օրենքներում լրացումներ կատարելու մասին օրենսդրական փաթեթը, որի անհրաժեշտությունը պայմանավորված է ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին օրենքի նախագծի ընդունման պարագայում նշված օրենքի ամբողջական կիրառումն ապահովելու հանգամանքով։ Նախարարը նշեց, որ «Հայաստանի Հանրապետության բյուջետային համակարգի մասին» ՀՀ օրենքում լրացում կատարելու մասին օրինագծով առաջարկվում է՝ որպես պետական բյուջեի հարկային եկամուտների աղբյուր ներառել նաև դրոշմանշային վճարները։ Այնուհետև պատգամավոր Հրանտ Բագրատյանը՝ անդրադառնալով օրենսդրական փոփոխություններին, ասաց, որ Հայաստանում չգիտես ինչու ամեն բան թարս է կատարվում: Ըստ նրա՝ կառավարությունը ներմուծում է մի թարս համակարգ, որը կարող է ունենալ անկանխատեսելի հետևանքներ: «Միշտ համապատասխան ձեռքով պետք է բռնել համապատասխան ականջը, ոչ թե թարս բաներ անել: Վճարը կամ հարկը պետական բյուջե մուծվող պարբերաբար կրկնվող անհատույց գումար է: Եթե խոսքը վերաբերում է հարկին, ինքը որպես հարկ էլ պետք է տնօրինվի և օգտագործվի: Մասնավորապես, ոնց կարող է հարկը հավաքի մեկը, բայց այնտեղ ստեղծվի խորհուրդ, Կենտրոնական բանկն էլ այդ խորհրդում ունենա երեք անդամ: Ինչ գործ ունի Կենտրոնական բանկը դրա հետ, ո՞րն է տրամաբանությունը», ասաց Բագրատյանը:
Հետևեք մեզ Viber-ում
