Կարեն Կարապետյանի խոսքը գետնով չեն տալիս
«Փաստ» օրաթերթը գրում է. «Իր նշանակումից կարճ ժամանակ անց վարչապետ Կարեն Կարապետյանը կառավարության բոլոր մարմիններին հանձնարարեց վերանայել իրենց կառավարման ոլորտում գտնվող ՊՈԱԿ–ների գործունեության նպատակահարմարությունը և ներկայացնել առաջարկություն ՊՈԱԿ–ների թվաքանակի կրճատման և օպտիմալացման վերաբերյալ` նշելով, որ խոսքը նաև ԾԻԳ–երի մասին է: Սպորտի և երիտասարդության հարցերի, արտակարգ իրավիճակների և մշակույթի նախարարներին հանձնարարեց մեկշաբաթյա ժամկետում քննարկել իրենց ենթակայությամբ գտնվող ԾԻԳ–երի լուծարման հարցը և ներկայացնել առաջարկություն: «Փաստի» տեղեկություններով` չարաբաստիկ լուծարման գործընթացը այդպես էլ լայն թափով տեղի չի ունենում, քանի որ այդ կառույցների մեծ մասը նորմալ աշխատում է. ունեն ընթացիկ ծրագրեր և նրանց լուծարումը կաթվածահար կանի աշխատանքը բազմաթիվ ոլորտներում: Եվ որպեսզի վարչապետի խոսքը «գետնով չտան»` վերոնշյալ ՊՈԱԿ–ներն ու ԾԻԳ–երը վերափոխվում են հիմնադրամների` շարունակելով կատարել նույն աշխատանքը:
Հետևեք մեզ Viber-ում
