Նյու Յորքի ամանորյա ավանդույթը. Ամանորը ԱՄՆ-ում

Եթե դուք որևէ հայի հարցնեք, թե որն է տարվա ամենակարևոր տոնը, ձեզ կպատասխանեն, որ Ամանորը: Ամերիկացիներին այդ հարցը տալուց հետո, դուք այլ պատասխան կստանաք, քանի որ նրանք սրտատրոփ սպասում են Սուրբ Ծնունդին, Հելոուինին, քան Ամանորին: Սակայն դա չի նշանակում, որ Ամանորն Ամերիկայում համեստ ձևով են տոնում: Ամերիկայում Ամանորի խորհրդանիշներից մեկը նորածինն է, քանի որ ցանկացած տարին նրանք համեմատում են երեխայի հետ, որը մեծանում է, ծերանում և տարվա վերջում իր պարտականությունները փոխանցում այլ նորածնի: Ամերիկացիների ընդունված ավանդույթ կարելի է համարել լուրջ որոշումների ընդունումը: Ամեն տարի նրանք մի որոշում են կայացնում, որը անպայման պետք է իրականացնեն, օրինակ՝ թողնեն ծխելը, մի նոր գործ սկսեն, հրաժարվեն ալկոհոլից, զբաղվեն սպորտով, հաշտվեն մտերիմների հետ: Եթե, օրինակ, չինացիների համար Ամանորն ընտանեկան տոն է, ապա ամերիկացիներից շատերը նախընտրում են տոնը նշել տարբեր տոնախմբությունների մասնակցելով, իսկ ոմանք էլ ցանկանում են հավաքվել ընկերներով և ընտանիքի անդամներով: 1907 թվականին Նյու Յորքում ամանորյա նոր ավանդույթ ավելացավ, որը կա առ այսօր: Ամեն տարի դեկտեմբերի 31-ին, ժամը 23:59-ին, Times Square-ում, բարձր կետից ներքև է իջնում մի մեծ գունդ: Ուղիղ կեսգիշերին այն արդեն ամենաներքևում է լինում և դրանով ազդարարվում է նոր տարվա սկիզբը: Այս ավանդույթը բավականին հայտնի է և այդ պահին ցուցադրվում է ուղիղ եթերով՝ հեռուստաէկրանին գամելով մոտ 1 մլրդ հեռուստադիտող: ԱՄՆ-ում Ամանորը օֆիցիալ տոն է համարվում, հետևաբար հունվարի 1-ը հայտարարվում է հանգստի օր: Այդ օրը փակ են լինում բոլոր կառավարական հաստատությունները, դպրոցները, համալսարանները: Իբրև վերջաբան կուզենայինք նշել, որ ԱՄՆ-ում կա 6 ժամային գոտի, և երբ Նյու Յորքում արդեն բնակիչները խորը քուն են մտած լինում, Հոնոլուլույում նոր պատրաստվում են տոնակատարությանը: Տաթևիկ Թահմազյան