Թրամփի օդանավն արտակարգ վայրէջք է կատարել

ԱՄՆ նախագահի պաշտոնին հավակնող հանրապետական Դոնալդ Թրամփի անձնական օդանավը, որում եղել է միլիարդատերը, արտակարգ վայրէջք է կատարել Թենեսի նահանգի Նեշվիլ քաղաքի օդանավակայանում շարժիչի անսարքության պատճառով։ Այս մասին հայտնում է BNO News-ը։ Թրամփի Boeing-757-ի հետ կապված միջադեպը տեղի է ունեցել փետրվարի 3-ին։ Քաղաքական գործիչը, ով Այովայից ուղևորվելիս է եղել Արկանզաս՝ մասնակցելու համար նախընտրական հանրահավաքի, շարունակել է թռիչքն այլ օդանավով, սակայն միջոցառումից 2 ժամով ուշացել է։ ԱՄՆ քաղավիացիայի դաշնային վարչությունը միջադեպի առնչությամբ հետաքննություն է սկսել։ Փորձագետները Թրամփի հաջողությունը կապում են այն բանի հետ, որ նա, ի տարբերություն պրոֆեսիոնալ քաղաքական գործիչների, չի ամաչում իրերն իրենց անուններով անվանելուց և խոսում է խնդիրների մասին, որոնց քննարկումը համարվում է քաղաքականապես ոչ կոռեկտ։ ԱՄՆ նախագահի ընտրությունները նշանակված են 2016 թվականի նոյեմբերի 8-ին։