Հերթը Քոչարյանինն է

Խորհրդարանական ընտրություններում ՀԱԿ ցուցակը կգլխավորի Լևոն Տեր-Պետրոսյանը, այսօր ԱԺ ճեպազրույցների ժամանակ ասաց ՀԱԿ խմբակցության ղեկավար Լևոն Զուրաբյանը: Հարցին, թե այսինքն՝ նա ամբողջովին պատրա՞ստ է նորից մտնել պայքարի մեջ, Զուրաբյանը պատասխանեց՝ այո, իհարկե: Նա նշեց, որ դեկտեմբերի 17 կայանալիք ՀԱԿ համագումարին էլ առաջին նախագահը երկար ելույթով հանդես կգա: Այնինչ նախկինում Լևոն Տեր-Պետրոսյանը հրաժարվեց ընտրապայքարից՝ պատճառ բերելով տարիքը, այսօր չկա՞ նման խնդիր. «Այն ժամանակ խոսքը 2013-ի նախագահի թեկնածության մասին էր, գուցե տարիքային շեմը խոչընդոտ էր, բայց հիմա խոսքն այլ բանի մասին է»: Դե, իհարկե, սա քաղաքականություն է, այստեղ դու ազատ ես ստեղծագործելու, ֆռռացնելու, հորինելու, բանսարկության ու այլնի հարցում, եթե երեք տարի առաջ տարիքը կարող էր խոչընդոտ դառնալ, ապա երեք տարի հետո՝ չի կարող։ Լավ է ՀԱԿ-ում չեն արդարանում, թե Լեւոն Տեր Պետրոսյանը գնալով երիտասարդանում է, նոր ավյունով լցվում։ Հասկանալի է, որ առաջին նախագահի ներկայությունը ՀԱԿ ցուցակում սոսկ մարտավարական նշանակություն է ունենալու, եւ ամենայն հավանականությամբ Լեւոն Տեր-Պետրոսյանը պատգամավոր դառնալու անհագ ցանկություններով չի ապրում, ընդամենը խարիզմատիկ ու բացառիկ ինտելեկտի տեր գործիչների պակաս հատկապես մեր օրերում շատ է զգացվում, իսկ ՀԱԿ-ում այսկերպ փորձելու են դիրքային առավելություն վերցնել մրցակիցների նկատմամբ։ Բայց մյուս կողմից՝ ցուցակի գլխավորումն ինքնին նշանակում է նսեմացնել օրենսդիրի աշխատանքը, այն դիտարկել թոշակառուի աշխատանք։ Ինչևէ, բոլոր պարագաներում նման զարգացումը նոր ինտրիգ է մտցնում ներքաղաքական ներկապնակում։ Թվում էր, թե առաջին նախագահը վաստակած հանգստի է գնալու ու ռադիկալ էլեկտորատն այս ընտրություններին ուղղորդվելու է Քաղաքացիական պայմանագիր, Լուսավոր Հայաստան ու Հանրապետություն կուսակցությունների կողմը, բայց հիմա փոխվում է խաղի կանոնները։ Սերժ Սարգսյանը թերեւս իր երախտիքն է հայտնելու ՀԱԿ ղեկավարին ողջ տարվա ընթացքում իրեն արված աջակցության համար ու հաջորդ խորհրդարանից դուրս չի թողնելու։ Արդեն ակնհայտ է դառնում նաեւ Ծառուկյանի ու ՀԱԿ-ի համագործակցության բացառումը, այլապես ՀԱԿ-ում կսպասեին Ծառուկյանի վերադարձի հայտարարությանը ու հետագա գործընթացներին, քանի որ չի բացառվում, որ Ծառուկյանի շուրջ միասնական պլատֆորմ ձեւավորվի։ Չի բացառվում, որ այս անգամ Գագիկ Ծառուկյանը հետեւել է Ռոբերտ Քոչարյանի հորդորին, որ Տեր-Պետրոսյանի հետ գործակցությունը լավ տեղ չի տանի։ Մենք բազմիսց գրել ենք, որ Քոչարյանի ու Ծառուկյանի հարաբերությունները սրվել են այդ հողի վրա, երկրորդ նախագահը կատեգորիկ դեմ է եղել այդ համագործակցությունը, բայց Ծառուկյանը չի ընկրկել, իսկ հիմա ըստ երեւույթին հետեւություններ է արել։ Կամ էլ վերադարձի պարագայում Ծառուկյանը տեղավորվելու է կանխատեսելի դաշտում ու նախկինի պես չի առջակատելու իշխանության դեմ։ Չափավոր ընդդիմության կարգավիճակում էլ Ծառուկյանին կհաջողվի մեծ էլեկտորատ հավաքել, իսկ ընտրություններից հետո դաշինք կազմել ՀՀԿ-ի հետ։ Նկատենք, որ Միքայել Մելքումյանն անդրադառնալով ԲՀԿ ցուցակը գլխավորելու հարցին կոնկրետ չի ասել, որ լինելու է Ծառուկյանը, ասել է միայն, որ Գագիկ Ծառուկյանն է ղեկավարելու «այն սխեման, որով Բարգավաճ Հայաստանը գնալու է ընտրություններին»: ՀՀԿ խմբակցության ղեկավար Վահրամ Բաղդասարյանն իր հերթին է հայտարարել, որ ՀՀԿ ցուցակը գլխավորողը լինելու է Սերժ Սարգսյանը՝ կարծես թե փակելով Կարեն Կարապետյանի ախորժակը, որի թիմը հույսեր է տածում, թե նա է լինելու ցուցակի առաջինը։ Մնում է «Համախմբումը» եւ այս համատեքստում տրամաբանական կլիներ, որ հայտարարվեր Ռոբերտ Քոչարյանն է գլխավորելու ցուցակը, այդ պարագայում պայքարը իսկապես դիտարժան կլիներ։ Անի Սահակյան