Ինչ է սպասվում ձեզ 2017 թվականին. ում կժպտա հաջողությունը

Աստղաբան, Ռուսաստանի բնական գիտությունների ակադեմիայի անդամ, մաթեմատիկոս Էլյա Հովհաննիսյանը այսօր լրագրողների հետ զրույցում նշեց, որ աքաղաղն աշխատասեր է, և բոլոր աշխատասերներին հաջող տարի է սպասվում: «2017 թվականն իր թվական տվյալներով ստացվում է «1»՝ 2+1+ 7=10, 0-ն թողնում են, մնում է 1։ «1» թվանշանը նոր սկիզբ է, նոր գործունեություն, կյանքի ոգին տանում է նոր բացահայտումների։ Նրանք, ովքեր կօգտվեն դրանից, հետո շատ կշահեն, ուղղակի պետք է իմանալ՝ ինչ է պահանջվում։ Այն, որ տարին 7-ով է ավարտվում, նշանակում է, որ հիմնականում փոփոխությունների տարի է։ Իսկ փոփոխություններից պետք է ոչ թե խուսափել, այլ հնարավորություն ստեղծել, օգնել, որ այդ փոփոխությունները հասնեն իրենց ծրագրին համապատասխան։ Առաջընթացի կտանեն միայն նրանց, ովքեր կօգնեն փոփոխություններին, կաշխատեն, որ փոխվի իրավիճակն այնպես, ինչպես տիեզերքն է  պահանջում։ Այնպես չէ, որ ամեն մարդ բնազդով  ինչ ցանկանա՝ արդյունքի կարող է հասնել, փոփոխությունները դրա համար են, որ յուրաքանչյուր մարդ մտածի՝ ինչ  է պետք անել»։ Աստղաբանի համոզմամբ՝ դժվար կլինի նաև այն մարդկանց համար, ովքեր ծնվել են օձի, վագրի և շան տարում։ Նրանցից պահանջվում է հատուկ ուշադրություն իրենց անձի նկատմամբ, որովհետև նրանք քիչ են հետաքրքրվում՝ ով են իրենք, ինչու են ծնվել, ինչ է պահանջվում իրենցից։ իսկ ահա  եզի, ձիու, այծի, խոզի տարիներին ծնվածների համար հաստատ հաջողությունը կժպտա: