Հրդեհաշիջման աշխատանքների ավարտին հրշեջ-փրկարարները վրաերթի են ենթարկվել

Երեկ՝ դեկտեմբերի 9-ին, խոշոր հրդեհ է տեղի ունեցել Արարատի մարզում։ Ժամը 20։40-ի սահմաններում Արտակարգ իրավիճակների նախարարության փրկարար ծառայության Արարատի մարզային փրկարարական վարչության օպերատիվ կառավարման կենտրոն ահազանգ ստացվել, որ Երևան-Երասխավան ավտոճանապարհի «Արարատ» ռեստորանային համալիրի մոտ ավտոմեքենա է այրվում։ Ինչպես հայտնում է ֆոտոլրագրող Գագիկ Շամշյանը, հրդեհի վայր են ժամանել Արտաշատի թիվ 25 հրշեջ-փրկարարական ջոկատը, ովքեր մարել են ավտոմեքենայում առաջացած խոշոր հրդեհը, սակայն այն ամբողջովին վերածվել է երկաթե ջարդոնի։ Պարզվել է, որ այրված Opel Astra մակնիշի 34 PA 882 համարանիշի ավտոմեքենան պատկանում է Շավարշ Գրիգորյանին, ում ամբողջական տվյալները ճշտվում են։ Հրշեջների աշխատանքը տեղում ղեկակավարել է Արարատի մարզային փրկարարական վարչության պետ Մուրադ Մարգարյանը։ Տեղում են եղել նաև Արարատի մարզային հրդեհային և տեխնիկական անվտանգության տեսչության տեսչական բաժնի պետ Հ. Ալեքսանյանը, ինչպես նաև ոստիկանության Արտաշատի բաժնի օպերատիվ խումբը՝ օպերատիվ հերթապահ Վարդանյանի գլխավորությմբ։ Գ. Շամշյանը հայտնում է, որ հրդեհաշիջման աշխատանքների ավարտից հետո Վազ 21011 մակնիշի 34 AO 781 համարանիշի ավտոմեքենայի վարորդ, 25-ամյա Վահրամ Աբրահամյանը նշված ավտոմեքենայով վրաերթի է ենթարկել թիվ 25 հրշեջ-փրկարարական ջոկատի հերթափոխի պետ, փրկարար ծառայության լեյտենանտ Էդգար Սարգսյանին և վարորդ, փրկարար ծառայության սերժանտ Մկրտիչ Սահակյանին։ Վերջիններս տեղափոխվել են Արտաշատի բժշկական կենտրոն, որտեղից ֆոտոլրագրողին հայտնել են, որ նրանց կյանքին վտանգ չի սպառնում։ Վրաերթի փաստով ոստիկանության Արտաշատի բաժնի հետաքննչական բաժանմունքում նյութեր են նախապատրաստվում։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարը՝ Գագիկ Շամշյանի