Փառանձեմ Մեյթիխանյան. «Իմ սկեսուրը հենց դեպքի վայրում է ասել, որ հետո ճանաչելու է նրանց դեմքերը»
Հայտնի լեզվաբան Փառանձեմ Մեյթիխանյանի ամուսնու Եղիշե Խաչիկյանի սպանությունը տեղի է ունեցել հենց նրա մոր աչքի առջև: Հունիսի 4-ին Նուբարաշեն խճուղու հատվածում Եղիշե Խաչատրյանը դաժանորեն ծեծի էր ենթարկվել և սպանվել: Այսօրվա լրագրողների հետ հանդիպման ժամանակ լեզվաբանն ասաց. «Երբ կռիվը թեժացել է ամուսնուս մայրը՝ Էմմա Աբրահամյանը, իջել է ավտոմեքենայից և փորձել է ինչ-որ կերպ ազատել ու օգնել տղային, բայց հնարավոր չի եղել այդ գազանների ճիրաններից փրկել նրան: Սկսեուրս հենց դեպքի վայրում է գոռացել, որ հետո ճանաչելու է նրանց դեմքերը և այդպես էլ եղել է»: Նրա փաստաբան Ինեսսա Պետրոսյանը հավելեց, որ առաջին ձեռբակալվածը եղել է Խաչիկ Կոսյանը և հենց Եղիշե Խաչատրյանի հոգեհանգստի օրը, նրա մայրը՝ Էմմա Աբրահամյանը մասնակել է Խաչիկ Կոսյանի ճանաչման քննչական գործընթացին և ճանաչել նրան: «Ինչպես ես, այնպես էլ վարույթն իրականացնոց քննիչը նախազգուշացրել էինք Էմմա Աբրահամյանին, որ եթե հանկարծ կասկածներ լինեն, ուղղակի ցույց տալու համար ցույց չտա ինչ-որ մեկին: Էմման Աբրահամյանը ուսումնասիրելով 4 անձանց, ցույց տվեց Յուրի Հակոբյանին և պարզվեց որ դա նույն անձն է, որը դեպքի վայրում եղել է առաջին եռյակի մեջ և ում պատկանում էր ավտոմեքենան»: Էմմա Աբրահամյանն իր բոլոր ցուցմունքներում նշել է, որ սպանությունը կատարել են 6 հոգով: Նույնիսկ, երբ արդեն Եղիշեն Խաչատրյանը մահացած է եղել, նրանցից Արտաշես Չիչոյանը նորից է վերադարձել և հարվածել նրա գլխին: Դատաբժշկական փորձաքննության արդյունքում պարզվել է, որ հարվածների քանակը 20-ից ավել է եղել, որոնցից տասը՝ կյանքին վտանգ սպառնացող: «Իմ սկեսուրը և այդ աղջիկը, որը եղել է խուլիգանների հետ փորձել են բաժանել առաջին եռյակին: Երբ մոր ներկայությամբ իրեն հայհոյել են, նա իջել է մեքենայից: Իմ ամուսնու դիակը հայտնաբերվել է Ֆորդ Տրանզիտի հետնամասում: Եթե իմ ամուսինը հարձակվեր, այլ ոչ թե պաշտպանվեր, նրա դիակը կլիներ մեքենայի դիմացի մասում: Նրան քշել են և նա պաշտպանվելով եկել է մեքենայի հետևը՝ շատ լավ զգալով վտանգը: Այդ երիտասարդները միայն ալկոհոլի ազդեցության տակ չեն եղել, սկեսուրս դա նկատել է: Հետո ծեծկռտուքին միացել է երկրորդ եռյակը ավտոտեխսպասարկման կետից և նրանց բաժանելու ընթացքում աղջիկը ասել է սկեսուրիս, թե տղայիդ քաշիր մի կողմ, տղադ չգիտի ում է ծեծում: Ամուսինս վայր է ընկել Խաչիկ Կոսյանի հարվածից, բայց մյուսներն էլ ձեռքները գրպաններում չեն կանգնել և սպասել, այլ ամեն մեկն իր հերթին փորձել է ցույց տալ իր տղամարդկությունը»,- ասաց Փառանձեմ Մեյթիխանյանը:
Հետևեք մեզ Viber-ում
