Բաց չեմ թողնելու խաղաժամանակ ստանալու հնարավորությունը. Հենրիխ Մխիթարյան

«Ես երբեք վատ հարաբերություններ չեմ ունեցել մարզչի հետ։ Մեր հարաբերություններն ի սկզբանե լավ են եղել։ Խնդիրը ոչ թե Ժոզե Մոուրինյոյի մեջ էր, այլ՝ իմ։ Հիմա հասկանում եմ, թե ինչու եմ սկսել խաղաժամանակ ստանալ և բաց չեմ թողնելու այս հնարավորությունը, քանի այն իսկապես կարևոր է ինձ համար։ Շատ եմ ցանկանում դառնալ «Մանչեսթեր Յունայթեդի» մի մասնիկը», -Sky Sports News-ի փոխանցմամբ Հայաստանի ազգային հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանը, խոսելով ընթացիկ մրցաշրջանի մեկնարկային հատվածում խաղաժամանակ չստանալու մասին, նշել է, որ գլխավոր մարզիչ Ժոզե Մոուրինյոյի հետ որևէ խնդիր չի եղել։ «Այսուհետ կանոնավոր խաղաժամանակ կստանամ:Դա ինձ համար շատ կարևոր է։ Դրա համար կանեմ հնարավոր ամեն ինչ։ Մարզիչն ընտրության մեծ հնարավորություն ունի․ իմ դիրքում կարող է 5-6 ֆուտբոլիստ խաղալ, բայց ես գիտեմ, թե ինչ սխալներ եմ թույլ տվել անցյալում և ինչպես պետք է լավ խաղամ ապագայում։ Հիմա ես գիտեմ՝ ինչպես կարող եմ օգնել թիմին», - նշել է Մխիթարյանը: