Օֆշորային սկանդալ համաշխարհային ֆուտբոլում. Սպասվում են նոր բացահայտումներ.armtimes.com

Եվրոպայի չեմպիոն, Եվրոպայի լավագույն ֆուտբոլիստ, աշխարհի լավագույն ֆուտբոլիստի կոչման հիմնական հավակնորդ, Մադրիդի «Ռեալի» պորտուգալացի հարձակվող Կրիշտիանու Ռոնալդուն կասկածվում է հարկային մեքենայությունների մեջ: Անցյալ ուրբաթ մամուլում հայտնված այս տեղեկությունը բավական կասկածելի թվաց, քանի որ մշտապես «Էլ կլասիկոներից»՝ «Բարսելոնա»-Ռեալ» Մադրիդ հանդիպումներից առաջ 2 թիմին սատարող լրատվամիջոցները նմանատիպ լուրերով ցանկանում են սրել իրավիճակը մրցակից թիմի ճամբարում: Թվում էր, թե Կրիշտիանու Ռանալդուի՝ հարկերը թաքցնելու մասին մասին լուրը հենց այս բնույթի էր, քանի որ տարածվեց հերթական «Էլ կլասիկոյից» ուղիղ 1 օր առաջ կատալոնական «El Mundo Deportivo» պարբերականում: Առավել խոր ուսումնասիրությունները, սակայն ցույց են տալիս, որ ֆուտբոլային աշխարհը կանգնած է լրջագույն ֆինանսական սկանդալի շեմին, եւ խոսքը ոչ միայն Կրիշտիանու Ռոնալդուի, այլ նաեւ մի շարք այլ հանրահայտ ֆուտբոլիստների, մարզիկների մասին է, ընդ որում տեղեկատվության աղբյուրն էլ ամենեւին կատալոնական պարբերականները չեն, այլ «Football Leaks» անունը կրող միջազգային անկախ լրագրողական համագործակցությունը: Նախ նշեմ, որ «Football Leaks»-ի մեջ միավորվել են հեղինակություն վայելող մի շարք մարզական պարբերականներ, որոնց թվում են գերմանական «Der Spiegel»-ը, կատալոնական «El Mundo Deportivo»-ն, անգլիական «Sunday Times»-ը, բելգիական «Le Soir»-ը, ֆրանսիական «Mediapart»-ը իտալական «L’Espresso»-ն: Հիմնականում  «Der Spiegel»-ի լրագրողների ջանքերով ձեռք է բերվել մոտ 18,6 միլիոն էջ կազմով տեղեկություններ՝ տարբեր ֆուտբոլիստների ֆինանսական մուտքերի եւ ելքերի մասին: «Football Leaks»-ը սկսել է ուսումնասիրել այդ փաստաթղթերը եւ արդեն հրապարակել է մի հատված՝ Կրիշտիանու Ռոնալդուն օֆշորային երկրներում գրանցված կազմակերպությունների միջոցով վերջին 7 տարիների ընթացքում թաքցրել է մոտ 150 միլիոն եվրո հարկ: Համաձայն փաստաթղթեր, պորտուգալացու եկամուտների մեծ մասը տեղափոխել է օֆշորային գոտի համարվող բրիտանական Վիրջինյան կղզիներում գրանցված կազմակերպության հաշվեհամարին եւ այսպես հնարավոր է եղել խուսափել իսպանական հարկային մարմիններից: Ի դեպ, տարիներ առաջ նման մեղադրանք ներկայացվեց նաեւ արգենտինացի Լիոնել Մեսիին եւ այն ավարտվեց գործարքների ֆինանսական պատասխանատուի՝ Մեսիի հոր պայմանական ազատազրկմամբ 21 ամիս ժամկետով: Կրիշտիանու Ռոնալդուի նկատմամբ էլ մեղադրանքները կարող են առավելագույնը հենց այդպիսի լուծում ստանալ, եթե իհարկե դրանք հաստատվեն: Պորտուգալացին տարիներ առաջ մարքեթինգային բոլոր իրավունքները վաճառել է իր գործակալ Ժորժե Մենդեշին պատկանող «Gestifute» կազմակերպությանը եւ ուղղակիորեն չի կարող ենթարկվել պատասխանատվության: Կրիշտինու Ռոնալդուի ֆինանսական բոլոր հոսքերի պատասխանատուն հենց «Gestifute»-ն է, որը նաեւ այս օֆշորային սկանդալում հայտնված մի շարք այլ պորտուգալացի ֆուտբոլիստների ֆինանսական պատասխանատուն է: «Football Leaks»-ը հայտարարել է, որ առաջիկա 3 շաբաթների ընթացքում շարունակելու է հրապարակել այլ ուսումնասիրություններ եւս, որոնք նույնպես հանրաճանաչ մարզիկների, ֆուտբոլիստների կողմից օֆշորային գոտիներում թաքցրած գումարների մասին են: Մարզաշխարհին սպասվում է ամենաիսկական օֆշորային սկանդալ, նման ամբողջ Երկիր մոլորակը իրար խառնած «WikiLeaks»-ի հրապարակումների հետ, որի արձագանքը հասավ Հայաստան: Արդեն իսկ նշվում են անուններ՝ Ժոզե Մոուրինյո, Ռադամել Ֆալկաո, Խամես Ռոդրիգես, Մեսութ Օզիլ, Պեպե  եւ այլն: Հատկապես հետաքրքիր է, որ այս նախագծի հեղինակ, գերմանական «Der Spiegel»-ը չի խնայում անգամ գերմանացի ամենահանրահայտ ֆուտբոլիստներից մեկին՝ Մեսութ Օզիլին: