«Ես շատ ուրախ եմ, որ Սերժ Թանկյանն էլ է ուզում մասնակցել ընտրություններին որպես դիտորդ». Արմեն Ռուստամյան
«Հայ Յեղափոխական Դաշնակցություն» ԱԺ խմբակցության ղեկավար Արմեն Ռուստամյանն այսօր խորհրդարանում լրագրողների հետ զրույցում ասաց, որ Հայաստանի Հանրապետական կուսակցության հետ «Դաշնակցության» համագործակցությունը կապված չէ ո՛չ ընտրությունների հետ, ո՛չ էլ կառավարության ձևավորման գործընթացի հետ: «Մենք այդ համագործակցության մասին հայտարարել ենք՝ նպատակները հռչակելով, և այդ նպատակների շուրջ է, որ մենք համագործակցում ենք: Դա կապված չի որևէ այլ ձևաչափի հետ»,- ասաց ՀՅԴ պատգամավորը, ապա հավելեց. «Մեր համագործակցության մեջ ժամկետներ չկան: Շատ հստակ արձանագրված է համագործակցության ընդհանուր տրամաբանությունը: Այն հիմնականում վերաբերում է սահմանադրական փոփոխությունները կյանքի կոչելու պրոցեսներին: Սա մեծ գործընթաց է, որ պետք է տեղի ունենա հստակ ժամանակահատվածներով, որոնք արձանագրված են Սահմանադրության անցումային դրույթներում»: Ուստի, նրա խոսքով, ՀՅԴ-ն կողմ է քվեարկելու 2017 թվականի բյուջեի նախագծին: Լրագրողները դաշնակցականից հետաքրքրվեցին, թե ինչ կարծիքի է Սերժ Թանկյանի հայտարարության մասին, թե Հայաստանում ընտրությունները թափանցիկ չեն և ինքը ապրիլին գալու է Հայաստան ընտրական գործընթացներին հետևելու: «Ես շատ ուրախ եմ, որ Սերժ Թանկյանն էլ է ուզում մասնակցել ընտրություններին որպես դիտորդ: Ես վստահ եմ, որ նա իսկապես կտեսնի, որ աննախադեպ ընտրություններ տեղի կունենան, որովհետև այն, ինչ-որ մենք փոխել ենք ընտրական համակարգի մեջ, նախադեպը չունի»,- ասաց նա:
Հետևեք մեզ Viber-ում
