ՊԵԿ-ում կադրային փոփոխությունները հասան պաշտոնյաների փեսաներին եւ հարազատներին. hraparak.am
Պետեկամուտների կոմիտեում այսօր «փեսաների» օր էր հայտարարված, կադրային փոփոխությունների թիրախում նախկին կամ ներկա պաշտոնյաների փեսաներն ու հարազատներն էին:Կայքի տեղեկություններով` Կոտայքի նախկին մարզպետ, վարչապետի նախկին խորհրդական Կովալենկո Շահգալդյանի փեսային` Հրանտ Կարապետյանին Վարդան Հարությունյանը Մաշտոցի հարկային տեսչությունից տեղափոխել է Գավառ եւ այնտեղ նշանակել տեսչության պետ: Ի դեպ, վերջերս Հրանտ Կարապետյանի մոտ «չեպե» էր արձանագրվել, նրա տեսուչին ձերբակալել էին կաշառքի համար: Հրանտ Կարապետյանի տեղափոխությունը համակարգում ընկալում են որպես «աքսոր»: Նախկին վարչապետ Հովիկ Աբրահամյանի փեսային` Շենգավիթի հարկային տեսչության պետ Վահան Մամիկոնյանին էլ տեղափոխել են օպերատիվ հետախուզական վարչության պետի տեղակալի պաշտոնին: Քաղաքական էլիտայի քեֆ, ուրախությունների օրրան` «Օջախ» ռեստորանի տերերից` Մանվել Եգանյանի փեսային` Արմեն Սաֆարյանին, ով Խոշոր հարկատուների տեսչության պետի տեղակալ էր, նշանակել են Արաբկիրի հարկային տեսչության պետ: Ի դեպ, Արաբկիրի հարկային տեսչության պետը Սասուն Հայրապետյանն էր: Նրան նշանակել են վարչություններից մեկի պետի տեղակալ:ԱԺ ՀՀԿ խմբակցության ղեկավար Վահրամ Բաղդասարյանի փեսայի` Աջափնյակ վարչական շրջանի ղեկավար Արտավազդ Սարգսյանի եղբորը` Արաբկիրի հարկային տեսչության պետի տեղակալ Կարեն Սարգսյանին նշանակել են Կոտայքի հարկային տեսչության պետ: Փաստորեն` այս գիշեր եւս «մաֆիան» անցավ Հովիկ Աբրահամյանի հարազատներից մեկի կողքով, ի տարբերություն Մանվել Եգանյանի եւ Վահրամ Բաղդասարյանի բարեկամների` Արգամիչի փեսայի պաշտոնը իջեցրել են:Մեկ տեղափոխություն եւս, ԱԺ ՀՀԿ-ական պատգամավոր Վարդան Այվազյանի եղբոր տղան՝ Արթուր Այվազյանը Կապանի հարկային տեսչության պետի պաշտոնից տեղափոխվել է Երեւան՝ նշանակվելով Ավտոտրանսպորտային միջոցների մաքսային ձևակերպումների մասնագիտացված մաքսատան պետի տեղակալ:
Հետևեք մեզ Viber-ում
