«Ուժայինները կուսակցականացվո՞ւմ են». Սոնա Մինասյան

Ինչպես արդեն տեղեկացրել էինք, երեկ Ազգային Ժողովի արտահերթ նիստում առաջին ընթերցմամբ ընդունվեց «Կուսակցությունների մասին» օրենքի  նախագիծը: Նոր օրինագծի  վերաբերյալ  զրուցեցինք «Ազատ Դեմոկրատներ»  կուսակցության  մամլո խոսնակ Սոնա Մինասյանի հետ:  Նա նշեց, որ նախագիծը շատ կարևոր նշանակություն ունի  որպես  սահմանդրական օրենք, նրա  խոսքով օրենքում կա դրական միտում՝  ինչ-որ չափով  այն ազատականացվել է, բայց  կան նաև  մի շարք խնդրահարույց դրույթներ: «Կիսում եմ  մեր գործընկերների  հնչեցրած մի շարք մտահոգություններ՝ կապված ֆինանսավորման, հիմնադիր համագումարում պատվիրակների թվի և ՀՀ մարզերում ներկայացվածության թվային պարտադրանքի վերաբերյալ, բայց պետք է անդրադառնամ նաև մեկ շատ կարևոր դրույթի, որին այդքան էլ ուշադրություն չի դարձվում քննարկումների ժամանակ: Գործող օրենքի 10-րդ հոդվածում սահմանվում է, թե ովքեր չեն կարող լինել կուսակցության անդամ կամ էլ հիմնադրել կուսակցություն: Հատկանշական է, որ այս նախագծում այդ հոդվածն էական փոփոխությունների է ենթարկվել: Մասնավորապես՝ եթե այսօր ազգային անվտանգության, ոստիկանության և իրավապահ մարմիների աշխատակիցները չեն կարող լինել կուսակցական, այս նախագծով որևէ արգելք չկա վերոնշյալ կառույցների ներկայացուցիչների կուսակցական գործունեության առումով»,- նշեց Սոնա Մինասյանը: Նրա խոսքերով, եթե անգամ օրենքի նախագիծը համապատասխանեցվել է ՀՀ նոր Սահմանադրությանը, որի 28-րդ հոդվածով կուսակցություն ստեղծելու և անդամագրվելու իրավունքները օրենքով  սահմանված կարգով կարող են  սահմանափակվել, ապա մենք այստեղ հստակ հակասություն ենք ունենում Սահմանդրության և Կուսակցությունների մասին օրենքի նախագծում: «Ստացվում է,  որ այս կարգավորումը քաղաքական դաշտում դերակատարում է ունենալու, շահագրգռելու և խրախուսելու է ուժային կառույցների աշխատակիցներին անդամագրվելու իշխող կուսակցության շարքերը: Այստեղ արդեն էականն այն չէ, թե որ կուսակցությունը կլինի իշխանության, այլ այն, որ ուժային համակարգը զարգանալու և առավել օբյեկտիվ աշխատելու համար պետք է հնարավորինս հեռու պահել կուսակցական կաղապարներից»,- ամփոփեց մեր զրուցակիցը: Սոնա Դավթյան