«Որոշ ԱԺ փորձագետների պատալոկը լինում է կոֆե եփելու ունակությունը». Նաիրա Զոհրաբյան
Խորհրդարանում շարունակվում է ԱԺ կանոնակարգ օրենքի փոփոխությունների նախագծի քննարկումը: ԱԺ ԲՀԿ խմբակցության ղեկավար Նաիրա Զոհրաբյանը մատնանշեց ԱԺ կիսադատարկ դահլիճն, ինչն, ըստ նրա, խորհրդարանի ներկայիս պատկերի ցուցանիշն է: «Եթե տանք խմբակցության ղեկավարին պատգամավորի փոխարեն քվեարկելու իրավունքը, ավելի վատ վիճակ ենք ունենալու հաջորդ խորհրդարանում: Չի կարելի այն դեպքում կիրառել, երբ պատգամավորը «վետերոկում» նստած է կամ սաունայում սուզված է ջրի մեջ, այլ այն դեպքում, երբ գործուղման է, փակ ծրարով տալ քարտուղարությանը, քանի որ երաշխիք չկա, որ խմբակցության ղեկավարը հետո խնդիր չի ունենա, որ պատգամավորը գա, ասի, թե ես այսպես եմ ասել, դու այսպես ես արել»,-առաջարկեց Զոհրաբյանը: Նրա կարծիքով, ֆիլտրեր պետք է դրվեն: Նա նաեւ ընդգծեց, որ պատգամավորի աշխատանքի համար շատ կարեւոր է փորձագետների աշխատանքը. «Եվրոպական որեւէ երկրում չեք տեսնի, որ պատգամավորը նստած օրենք է գրում. նա տալիս է գաղափարը, իսկ փորձագիտական խումբն աշխատում է դրա վրա: Իսկ մեր ԱԺ փորձագետներից շատերի դեպքում տեսնում ես, որ պատալոկը լինում է կոֆե էփելու ունակությունը: ԱԺ-ն չի վճարում նրանց այն բանի համար, թե էսպրեսսո՞ն են լավ եփում, թե՞ թուրքական սուրճը՝ զրո առնչություն պատգամավորական գործունեությանը: Այստեղ էլ դնենք ֆիլտրեր»:
Հետևեք մեզ Viber-ում
