ԱԺ նիստը կարող է տեւել մինչեւ ժամը 24.00-ն. փոփոխություններ

ՀՀԿ պատգամավորների եւ Արմեն Ռուստամյանի հեղինակած «ԱԺ կանոնակարգ օրենքի» նոր նախագծի քննարկումը ներկայացրեց ԱԺ պետաիրավական հարցերի հանձնաժողովի նախագահ Հովհաննես Սահակյանը: Նրա հաղորդմամբ՝ պատգամավորներին առավել հետաքրքրում է նստաշրջանների եւ նիստերի տեւողությունը և ասաց, որ քառօրյա նիստեր են լինելու, բայց երկուշաբթի լինելու է Խորհրդի նիստերի օրը, որից հետո երեքշաբթի առավոտյան ժամը 10.00-ից են սկսելու նիստերը, մինչեւ երեկոյան 18.00: Նիստերը կարող են շարունակվել մինչեւ օրակարգի սպառումը, բայց դա չի կարող տեւել ավելի քան 3 օր: Հ. Սահակյանը նշեց, որ իրենք ընդամենը փորձել են իրացնել սահմանադրական նորմը, այլ պարագայում կոպտորեն կխախտեն Սահմանադրության դրույթը. «Մենք ասում ենք՝ երբ խմբակցությունից  պատգամավորը դուրս է գալիս, ինքը պետք է հասկանա, որ կշեռքի մյուս նժարին դրված են իր մի շարք իրավունքներ՝ որպես պատգամավոր։ Ցանկացած պատգամավորիս  գնահատականը քաղաքական է, մենք նորմավորված աշխատանքի մեջ չենք  գտնվում, մենք առաջնորդվում ենք մեր խղճով, հետևաբար՝ այդ ընկալումը հասարակական և քաղաքական է, դրա համար վերաբերմունքը պետք է լինի քաղաքական։ Մենք ընդամենը սահմանել ենք՝ եթե սպիտակ եք՝ սպիտակ եք, սև եք՝ սև եք»: Այսպիսով՝ խորհրդի եւ ԱԺ-ի որոշմամբ՝ նիստերը կարող են շարունակվել ընդհուպ մինչեւ 24.00-ն: Այն նախագծերը, որոնք հանձնաժողովում բացասական եզրակացություն են ստացել, բայց որոշ դրույթներ դրական եզրակացություն են ստացել, կարող է պատգամավորն առանձին այդ դրույթները ամփոփել եւ ներկայացնել ԱԺ-ի քննարկմանը: Ինչպես նաև՝ ըստ կանոնակարգի՝ ձևավորվում է նաև նոր մարմին՝ ԱԺ խորհուրդ՝ կազմված հանձնաժողովների, խմբակցությունների, իշխանության ու ընդդիմության ներկայացուցիչներից: