Ազատություն թերթ, Meydan TV, Ամերիկայի ձայն, Ազատություն ռադիոկայան. ԶԼՄ-ներն արգելափակվել են Ադրբեջանում

Ադրբեջանում արգելափակվել են Ազատություն թերթի, Meydan TV­-ի, Ամերիկայի ձայնի, Ազատություն ռադիոկայանի ինտերնետային կայքերը: Այս մասին հայտնում է ադրբեջանական azadlıq.info լրատվական գործակալությունը: Գործակալության հաղորդմամբ` հետաքրքրական է այն հանգամանքը, որ վերոնշյալ կայքերը արգելափակված են միայն ադրբեջանական օգտատերերի համար, իսկ Ադրբեջանի տարածքից դուրս հասանելի են: Ադրբեջանի կապի նախարարությունը կայքերի արգելափակման վերաբերյալ որեւէ բացատրություն չի տվել: Տարեսկզբին Հեղինակավոր ամերիկյան The Washington Post թերթը «Ադրբեջանում անկախ մամուլի դեմ պատերազմ է հայտարարվել» վերնագրով հոդվածում գրել էր, որ քննադատությունը խստորեն զայրացնում է այդ երկրի նախագահ Իլհամ Ալիեւին: Նա լրագրող Խադիջա Իսմայիլովային բանտ է ուղարկել այն բանի համար, որ բացահայտել է երկրի ոսկու հանքերում նախագահի դուստրերի մասնաբաժինը: Դրանից հետո Panama Papers­-ը հայտնաբերել էր, որ այդ մասնաբաժինը շատ ավելի մեծ է: