Մոսկվայում Հայաստանի քաղաքացու սպանությունը կապ ունի՞ «օրենքով գող» Գիա Գյուրզայի մահվան հետ
Մոսկվայում իրավապահ մարմինները պարզել են Լիտովյան բուլվարում Հայաստանի քաղաքացու «պատվերով» սպանության հնարավոր վարկածները: Ըստ այդմ՝վարկածներից մեկը կարող է լինել Գիո Գյուրզա մականունով հայտնի «օրենքով գող» Գեորգի Շիրինովի հետ հաշվեհարդարի համար վրեժխնդրությունը: Իրավապահ մարմինների աղբյուրը «Ռոսբալտ»-ին պատմել է, որ հոկտեմբերի վերջին Գեորգի Շիրինովին անգիտակից վիճակում հիվանդանոց են տեղափոխել: Բժիշկները նրա մոտ գանգուղեղային վնասվածք են գտել, սակայն չեն կարողացել փրկել նրա կյանքը: Ինչպես նշվում է՝ Մոսկվայում Շիրինովն ու նրա մի քանի ընկերներ կոնֆլիկտ են ունեցել: Գիո Գյուրզան լավ ծեծվել է, բայց կարողացել է ոտքի վրա մնալ, քայլել: Նրան մեքենայով տուն են հասցրել, որտեղ վիճակը սկսել է վատանալ: Նա կորցրել է գիտակցությունը: Հայտնի է, որ Շիրինովի հակառակորդները Հայաստանից են եղել: «Նրանց ինքնությունը պարզվեց, երբ տեղի ունեցավ Լիտովյան բուլվարում Հայաստանի քաղաքացու սպանությունը: Նորից օպերատիվ տեղեկություն ստացվեց, որ զոհվածը հոկտեմբերի վերջին տեղի ունեցած ծեծկռտուքի մասնակից է, ինչ-որ մեկին ծեծել է, ամենայն հավանականությամբ՝ զոհը հենց «օրենքով գողն» է եղել: Սա դեռեւս վարկած է, բայց ավելի ու ավելի շատ ապացույցներ է ստանում»,- ասել է աղբյուրը: Լիտովյան բուլվարում սպանությունը տեղի է ունեցել նոյեմբերի 24-ի գիշերը: «Օրենքով գող» Գեորգի Շիրինովը քրեական աշխարհում նշանակալի անձ չէր: Նա «թագադրվել» է շուրջ մեկ տարի առաջ, հիմնականում բնակվում էր Մերձմոսկվայում:
Հետևեք մեզ Viber-ում
