Աղվան Վարդանյանը՝ քաղաքական ուժերի միջոցների մասին
«Ակնհայտ է, որ Սահմանադրական փոփոխություններից հետո քաղաքական առանցքային դերակատար են դառնալու քաղաքական կուսակցությունները. ակնհայտ է նաև, որ քաղաքական կուսակցություններն ունեն որոշակի ֆինանսական ինքնաբավության խնդիր»,- այսօր Ազգային ժողովում «Կուսակցությունների մասին» օրենքի նախագծի քննարկման ժամանակ ասաց ՀՅԴ խմբակցության քարտուղար Աղվան Վարդանյանը։ Նրա խոսքով՝ միշտ իշխանության մեջ եղած քաղաքական ուժերը տնօրինում են ավելի շատ միջոցներ՝ իրենց գաղափարները տարածելու ու ազդեցություն ունենալու առումով, և այն, ինչ ենթադրում է այսօր օրենսդրությունը, չափազանց նվազ գումար է: «Ե՞րբ ենք անդրադառնալու հենց այդ խնդրին, որ ԱԺ-ում ներկայացված քաղաքական ուժերը, և նրանք, որոնք որոշակի տոկոս են ապահովել ընտրություններում, կարողանան ավելի հարմարավետ զգալ, իրենց նվազագույն պահանջները հոգալ տարածքներում: Այն, ինչ հիմա ունենք օրենսդրությամբ, չափից դուրս անբավարար է»,- դիմելով Հովհաննիսյանին՝ հարցրեց Ա. Վարդանյանը: Ի պատասխան՝ նախարարն ասաց, որ պատգամավորն իրավացի է, ֆինանսական միջոցների սղությունն առկա է, սակայն օրենքն ամրագրում է պետական ֆինանսավորման չափը։
Հետևեք մեզ Viber-ում
