Կարեն Քոչարյան. «Ինչպես որ «չիստկա» արվեց կառավարությունում, այնպես էլ պետք է արվի ՀՀԿ-ում»

«Հայելի» մամուլի ակումբում այսօր քննարկվեց ՀՀԿ-ին անդամագրվելու Կարեն Կարապետյանի դիմումը: Բանախոսներն էին՝ սոցիոլոգ Ահարոն Ադիբեկյանը, քաղաքագետ Գուրգեն Եղիազարյանը և քաղտեխնոլոգ Կարեն Քոչարյանը: Ըստ Կարեն Քոչարյանի՝ այս որոշումը ՀՀԿ-ի և Կարեն Կարապետյանի համար երկկողմանի շահ և երկկողմանի կորուստ է ենթադրում: ՀՀԿ-ի կորուստը կայանում է նրանում, որ  կուսակցության որոշ ներկայացուցիչներ կկորցնեն իրենց ազդեցությունը: «Քաղաքական գործիչ լինելու համար պետք է լինել կուսակցական: Մինչև հիմա Կարեն Կարապետյանը պարզապես տնտեսական գործիչ էր, իսկ հիմա արդեն՝ քաղաքական: Պարզ է, որ միայն Կարեն Կարապետյանի ՀՀԿ մուտքով կուսակցությունը «մարդկային կերպար» չի ստանա: Մարդկային կերպար կստանան, երբ նաև դուրս գան անմարդկային դեմքերը: Ինչպես որ «չիստկա» արվեց կառավարությունում, այնպես էլ պետք է արվի ՀՀԿ-ում»- ասաց Կարեն Քոչարյանը: Այն հարցին, թե արդյոք «չիստկայի» արդյունքում ՀՀԿ-ն չի պառակտվի և չի բաժանվի երկու տարբեր կուսակցությունների, բանախոսները վստահաբար պատասխանեցին, որ նման բան տեղի չի ունենա: «Կարեն Կարապետյանն իր թիմով որակապես այլ միջավայր կստեղծի ՀՀԿ-ում, եթե չկարողանար չէր գա և չէր մտնի այս ճահճի մեջ: Այստեղ խնդիրն այլ տեղում է, ինչպես կդիմակայի նոր ուժին ՀՀԿ-ի առանցքը: Այնքան էլ լավ տրամադրված չեն: Բախումները դեռ առջևում են: Բայց մյուս կողմից Կարեն Կարապետյանի թիկունքին կանգնած է ժողովուրդը»- ասաց Գուրգեն Եղիազարյանը:: Ըստ Ահարոն Ադիբեկյանի՝ Կարեն Կարապետյանի արդյունաբերության ոլորտին ծանոթ լինելը կօգնի, որ նա ոչ թե ճանապարհների ասֆալտապատման մասին հոգա, այլ մեր երկրում ստեղծի մրցունակ արդյունաբերություն: Իսկ Կարեն Քոչարյանի կարծիքով՝ Կարեն Կարապետյանի գործառույթը նախ՝ կոռուպցիայի դեմ պայքարելն է ոչ թե բառերով, այլ կոնկրետ օրինակներով և գործով: «Հակառակ դեպքի համար մի լավ հումոր կա՝ «У нас борьба с коррупцией это как рыбалка на канале «Discovery». Поймали, показали, отпустили» - հավելեց բանախոսը: Տաթևիկ  Թահմազյան