Յոթ պատճառ, թե ինչու Կարապետյանը որոշեց անդամակցել ՀՀԿ-ին
ՀՀ վարչապետ Կարեն Կարապետյանը Կառավարության այսօրվա նիստում հայտարարեց, որ ՀՀԿ-ին անդամակցելու դիմում է ներկայացրել: «Այսօր ես դիմում եմ ներկայացրել ՀՀԿ-ին անդամագրվելու համար, ինչը տրամաբանական է»,-ասաց վարչապետը: Կարեն Կարապետյանը մեկնաբանեց, որ նախևառաջ իրեն վարչապետի պաշտոնին հրավիրել է ՀՀ նախագահ, Հայաստանի Հանրապետական կուսակցության նախագահ Սերժ Սարգսյանը, և, բացի այդ, այդ որոշումը կայացնելու համար մի շարք պատճառներ կան:
Երկրորդը ըստ վարչապետի այն է, որ յուրաքանչյուր Կառավարություն պետք է ունենա քաղաքական հենարան, եւ իրենց Կառավարությունը եղել է ՀՀԿ-ի Կառավարությունը:
«Երրորդ, եթե հաշվի չառնենք առաջին երկու կետերը իմ կողմից նշված, ոմանց մոտ կարող է լինել տեսական հարցադրում, թե ինչու չենք կարող ստեղծել, կամ հիմնադրել մեկ այլ կուսակցություն, որը կարող էր լինել մեր հենարանը, ամենեւին դա արդարացված չէր լինի: Ունենալով Արցախի հիմնախնդիրը, մեր երկրի անվտանգությանն ուղղված սպառնալիքներ, մենք պետք է բոլոր զերծ մնանք հնարավոր բոլոր նմանատիպ զարգացումներից»,- մեկնաբանեց վարչապետը:
Որպես չորրորդ պատճառ վարչապետը նշեց, թե ՀՀԿ-ն կարող է լինել փոփոխություններ իրականացնող հենարան: Ըստ Կարապետյանի ՀՀԿ-ն իրեն հոգեհարազատ է, հատկապես կուսակցության պահպանողական գաղափարախոսությունը: «Եվ այնտեղ ինձ համար ընդունելի բազմաթիվ մարդիկ կան»,- նշեց վարչապետը:
Հինգերորդ պատճառն այն է, որ ըստ Կարապետյանի ստանձնելով վարչապետի պաշտոնը ինքը դարձել է փոփոխությունների մասնակիցը, վերցնելով իր պատասխանատվության բեռը: Կարապետյանը հայտարարեց, որ հաշվի առնելով այս ամենը իր ընկերներից, համախոհներից շատերը եւս ցանկություն են հայտնել միանալ այս գործընթացին, նոր սկիզբ դնելով շարժմանը: Վարչապետը նշեց, թե որեւէ պարտադրանք չկա, որ անկուսակցական նախարարները անդամակցեն ՀՀԿ-ին, քանի որ դա յուրաքանչյուրի գիտակցական որոշումն է: «Ըստ իս ՀՀԿ-ն այն կուսակցությունն է, որը հաշվի առնելով առկա մարտահրավերները, որոշել է փոխվել, եւ ունի իր մեջ այդ ներուժը»,- ասաց նա:
Փայլակ Ֆահրադյան
Հետևեք մեզ Viber-ում
