Վիգեն Սարգսյանը սասանեց իր իմիջը

<Չէր կարելի դա մտցնել հարկային սիստեմի մեջ, կարելի էր հոգաբարձուների վստահելի խորհուրդ ստեղծել: Եթե իրոք բանակին փող էր պետք, նախ պետք էր երկու քայլ իրականացնել, առաջինը՝ քննել, թե ինչպես ստացվեց, որ ամբողջ տնտեսական դաշտը, ապրանքաշրջանառությունը աշխատում է բանակի վրա, բայց արդյունքում պարզվում է, որ բանակը կռվում է հին զենքով, բանակում զինվորին պահելու համա փող չկա>,-Հայելի ակումբում հրավիրված մամլո ասուլիսի ժամանակ նշեց Ազատ Դեմոկրատներ կուսակցության փոխնախագահ Անուշ Սեդրակյանը ՝անդրադառնալով ՊՆ Վիգեն Սարգսյանի ներկայացրած հազար դրամի նախագծին, հավելելով, որ հայ հասարակությունը իշխանությանը չի վստահում, չի հավատում նրա բարեփոխումներին, բայց հավատում է զինվորին, եւ հետեւաբար այդ հավատը դնել պայթունավտանգ իրավիճակում սխալ է: Սեդրակյանի խոսքով՝ հատկապես ապրիլյան քառօրյա պատերազմից հետո պետք է իրականացվեր հետաքննություն եւ պատժվեին բոլոր մեղավորները, միայն դրանից հետո դիմել հասարակության օգնությանը: <Ցավում եմ, որ ՊՆ Վիգեն Սարգսյանը, ով ներկայացնում է երիտասարդ սերնդի կառավարումը, ինքը պետք է օրինակ ավելի հաստատվեր դրական նորմերով, ինքը մտավ նման նախագծի տակ, եւ նրա անձնական իմիջը սասանեց>,- ասաց Անուշ Սեդրակյանը, հավելելով, որ Հայաստանը, որը գտնվում է չհայտարարված պատերազմի մեջ, Պաշտպանության նախարարի իմիջը պետք է դրական լինի: <Չի կարելի խոսել թաքուն փողի մասին, թաքուն փողը պետք է ետ բերել, եւ ավելին պատժել>,- ասաց նա: Պատասխանելով հարցին թե իշխանությունները արդեն իսկ ակնկարկում են, որ կամավոր սկզբունքով է պահվելու հազարական դրամը, Անուշ Սեդրակյանը նշեց, թե ինչպես կուտակային կենսաթոշակային համակարգի պարագայում, այս դեպքում էլ իշխանությունները նախընտրական շրջանում վախեցան հասարարական արձագանքից: Միեւնույն ժամանակ Սեդրակյանը չբացառեց, որ ընտրություններից հետո դարձյալ այն մտնի որպես պարտադիր բաղադրիչ: Փայլակ Ֆահրադյան