Թուրքիայում ձերբակալվել է Հայոց ցեղասպանությունը ճանաչած քաղաքապետը
Թուրքական Anadolu գործակալության հաղորդմամբ՝ Թուրքիայի Մարդինի քաղաքապետի պաշտոնից օրերս հեռացված ազգությամբ քուրդ Ահմեթ Թուրքը, որը բազմիցս ներողություն է խնդրել Հայոց ցեղասպանության համար, ձերբակալվել է: Նոյեմբերի 17-ին Թուրքիայի ներքին գործերի նախարարությունը հեռացրել էր Ահմեթ Թուրքին քաղաքապետի պաշտոնից: Նրա նկատմամբ հետաքննություն էր սկսվել «պետության միությունն ու միասնականությունը խախտելու, զինված ահաբեկչական խմբավորմանը գումար տալու և անդամ լինելու, պաշտոնեական դիրքի չարաշահման, թուրք ժողովրդին, Թուրքիայի Հանրապետությանը, Թուրքիայի Ազգային մեծ ժողովին նվաստացնելու» մեղադրանքներով: Նա ներողություն է խնդրել հայերից` ասելով. «1911-ին «Իթիհաթ վե թերաքի» կուսակցության 3 առաջնորդ հանդիպեցին և պատմական որոշում կայացրին՝ քչացնել քրիստոնյաներին սունի դարձնել ալևիներին և ուծացնել քրդերին։ Ցավոք, այդ ծրագրի իրականացման ժամանակ 1915-ին քուրդ ժողովուրդը օգտագործվեց։ Մենք դեռ վերապրում ենք այն ցավը, որ մեր պապերն ու հայրերը մասնակցել են այդ կոտորածներին։ Մենք երբեք չենք մոռանա մեր եղբայրների ցավը»:
Հետևեք մեզ Viber-ում
