«Վահան Շիրխանյանը 3 ամիս է՝ լոգանք չի ընդունել». ահազանգում է Հայկ Ալումյանը

«Երեւան-Կենտրոն» ՔԿՀ-ի մեկուսարանում գտնվող ՀՀ պաշտպանության նախկին փոխնախարար Վահան Շիրխանյանն այս 11 ամիսների ընթացքում ավելի քան 4000 դեղահաբ է ընդունել, որոնց արդյունքը եղել է այն, որ  նա այսօր չի կարողանում ինքնուրույն շարժվել: Այս մասին այսօր Հայելի ակումբում լրագրողների հետ զրույցում ահազանգեց նրա պաշտպան Հայկ Ալումյանը: «Վահան Շիրխանյանի առողջական վիճակը ծայրահեղ ծանր է: Փաստաթղթերով մեզ կարող են ցույց տալ, որ նրա հետ կատարվում են բազմաթիվ բժշկական գործողություններ, բազմաթիվ հետազոտությունների է ենթարկվում, բայց դա ոչինչ չի նշանակում, եթե կարողանաք տեսնել, թե ինչ դինամիկայով է զարգանում նրա վիճակը: 3 օր առաջ ես իր հետ զրուցում էի, նա ասաց, որ այս 11 ամսվա ընթացքում մոտ 4 հազար դեղահաբ է ընդունել, բայց արդյունքն այն է, որ ինքն առողջ մարդ լինելով՝ ձերբակալվել է, իսկ այսօր հաշմանդամ է, ինքնուրույն տեղաշարժվել չի կարողանում»,-ասաց նա: Ալումյանը Վահան Շիրխանյանի առողջական վիճակի համար դիմել է ՄԻՊ, Արդարադատության նախարարություն, ինչպես նաեւ քրեակատարողական վարչություն, բայց պատասխան է ստացել միայն ՄԻՊ-ից: «ՄԻՊ-ը որոշում է կայացրել, որով ճանաչել է, որ խախտվել է Վահան Շիրխանյանի  առողջության պահպանման իրավունքը, ինչպես նաեւ՝ առաջարկել նրան անհապաղ տեղափոխել մասնագիտացված հիվանդանոց եւ պահանջել, որ նման խախտումներ թույլ տված անձինք պատասխանատվության ենթարկվեն: ՄԻՊ-ի այդ որոշումը, վստահ եմ, ստացել է նաեւ արդարադատության նախարարությունը, որից առ այսօր պատասխան չկա: Իրենք իրենց իրավունք են վերապահում ընդհանրապես չպատասխանել: Այսպիսի փնթի աշխատանք, վերաբերմունք ես դեռ չեմ հանդիպել»,-ասաց Ալումյանը՝ տեղեկացնելով, որ ՄԻՊ որոշումը ստացել են նոյեմբերի 10-ին: Նա հավելեց՝ կարծես խնդիր է դրված, որ Վահան Շիրխանյանը չկարողանա հասնել դատարան: Սոնա Դավթյան