ՌԴ ՊՆ-ն Թուրքիային մեղադրել է Սիրիայի սահմանամերձ բնակավայրերը հրետակոծելու մեջ. տեսանյութ
ՌԴ պաշտպանության նախարարությունը մեղադրել է Թուրքիային Սիրիայի հարակից բնակավայրերը գնդակոծելու մեջ ու բացատրություն է պահանջել ՆԱՏՕ-ից ու Պենտագոնից, հայտնում է BBC-ի ռուսական ծառայությունը: Համապատասխան հայտարարությունը այսօր ճեպազրույցում արել է ՌԴ պաշտպանության նախարարության պաշտոնական ներկայացուցիչ Իգոր Կոնաշենկովը: Նրա խոսքով՝ Սիրիայի հետ սահմանին՝ թուրքական սահմանային կետերից մեկում, վերջին ամիսներին ծանր հրետանի է տեղակայվել: «Եթե հարկավոր են փաստեր, խնդրեմ»,- ասել է Կոնաշենկովը՝ ցուցադրելով տեսանյութ, որտեղ երևում է կրակող հրետանին: «Սա կոչվում է փաստ: Սա անհերքելի ապացույց է այն բանի, որ թուրքական զինված ուժերը խոշոր տրամաչափի հրետանային համակարգերից գնդակոծում են սիրիական սահմանամերձ բնակավայրերը»,- հավելել է նա: «Սպասում ենք Թուրքիայի ԶՈՒ-ի գործողությունների մասին նույնքան արագ ռեակցիայի ու բացատրությունների ՆԱՏՕ-ի ու Պենտագոնի ներկայացուցիչների կողմից»,- ասվում է գերատեսչության կայքում: Այս տեսանյութը հրապարակվել էր այն բանից հետո, երբ Անկարան ռուսական կողմին մեղադրել էր Թուրքիայի օդային սահմանը հատելու մեջ։ Պենտագոնը համաձայնել էր Թուրքիայի հայտարարությունների հետ։
Հետևեք մեզ Viber-ում
