Սիրիահայերը Հայաստան ավտոմեքենա կներմուծեն առանց «ռաստամոշկի» փողը մուծելու

ՀՀ կառավարությունն այսօրվա նիստում որոշում կայացրեց Սիրիայի Արաբական Հանրապետության` ազգությամբ հայ քաղաքացիների կողմից Սիրիայից 2012 թվականի հուլիսի 1-ից հետո ընկած ժամանակահատվածում Հայաստան ներմուծված ավտոմեքենաների մաքսային վճարների և օրենքով սահմանված կարգով մաքսային մարմիններին վճարման ենթակա այլ վճարների վճարման հետ կապված ֆինանասական ծախսերը կատարելու նպատակով՝ պահուստային ֆոնդից պետական եկամուտների կոմիտեին հատկացնել 233 միլիոն 365 հազար դրամ: Կառավարության այս որոշման նախագիծը գործադիրի հավանությանը ներկայացրեց ՀՀ ֆինանսների նախարարի տեղակալ, գլխավոր գանձապետ Ատոմ Ջանջուղազյանը: Նա ասաց, թե գումարը հատկացվելու է բյուջետային ծախսերի տնտեսագիտական դասակարգման «Պարտադիր վճարներ» հոդվածով, որից հարկային եկամուտների եւ պետական տուրքի գծով` 231 միլիոն 223 հազար դրամ, մաքսավճարի գծով` 2 միլիոն 142 հազար դրամ: Այս որոշման նախագծի ընդունման անհրաժեշտությունը բխում է ՀՀ վարչապետի 2016 թվականի ապրիլի 15-ի հանձնարարականից՝ նպատակ ունենալով աջակցություն ցուցաբերել պատերազմական իրադարձությունների հետևանքով Հայաստանի Հանրապետությունում բնակվող բազմաթիվ սիրիահայերին: Փայլակ Ֆահրադյան