Իրանը շահագրգռված է ԼՂ հիմնախնդրի կարգավորմամբ. ԱԳ նախարար

ՀՀ ԱԳ նախարար Էդվարդ Նալբանդյանը,լրագրողների հետ հանդիպմանը ,հարցին, թե ինչպե՞ս է վերաբերվում Իրանի` ԼՂ հիմնախնդրի կարգավորման գործում միջնորդ դառնալու պատրաստակամության վերաբերյալ հայտարարություններին, նշեց, որ Իրանի միջուկային ծրագրի շուրջ վեցյակի պայմանավորվածություններն ամենանշանալի ձեռքբերումներից էին, և որ դա հնարավոր եղավ կողմերի քաղաքական կամքի և ճկուն դիվանագիտության շնորհիվ: «Մեր բարեկամ ու հարևան Իրանին վերաբերող կարևոր նշանակություն ունեցող հարցի շուրջ պայմանավորվածությունը մեզ չէր կարող չուրախացնել, քանի որ այն նոր հնարավորություններ է բացում առևտրատնտեսական զարգացման ու ընդլայնման տեսանկյունից, տարբեր ծրագրերի իրականացման տեսակյունից, որոնք ժամանակավորապես կանգ էին առել պատճամիջոցների կիրառման ժամանակ: Երբ ասում եմ` բարեկամ, հարևան, սոսկ խոսքեր չեն, Իրանն այն երկիրն է, որտեղ մեծ հարգանքով են վերաբերվում մեր մշակութային ժառանգությանը, վերականգնում են հայկական հուշարձանները: Իրանում մեծ հարգանքով են վերաբերվում մեր հայ համայնքին, որը մշտապես իրեն ապահով է զգացել, և սա փոխադարձ է, նույն հարգանքը կա Հայաստանի կողմից: Հայաստանն ու Իրանը շահագրգիռ են անել ամեն ինչ, որ մեր հարաբերությունները զարգանան ու ամրապնդվեն»,- ասաց նախարարը: Ինչ վերաբերում է ԼՂ կարգավորման հարցում Իրանի միջնորդությանը, Էդվարդ Նալբանդյանը նշեց. «ԼՂ հիմնախնդրի կարգավորման մեջ առաջընթաց չկա ոչ թե, որովհետև միջնորդները լավը չեն կամ լավ առաջարկություններ չեն անում, այլ այն պատճառով, որ Ադրբեջանը չունի քաղաքական կամք: Ես վստահ եմ, որ Իրանը շահագրգռված է օր առաջ տեսնել ԼՂ հիմնախնդրի կարգավորումը»: