Ալիևյան ընտանիքի նոր թիրախները

Օրերս «ցնցող» որոշում է կայացրել Ադրբեջանի նախագահը: Պարզվում է, Ադրբեջանում տեղեկատվական համացանցի տիրույթում պետության ղեկավարին՝ նախագահին, վիրավորելու փորձերը կպատժվեն քրեական պատասխանատվությամբ։ Ադրբեջանի գլխավոր դատախազ Զաքիր Գարալովն այդ առաջարկն ուղարկել է խորհրդարան Ադրբեջանի քրեական օրենսգրքի 323.1 հոդվածում ուղղումներ մտցնելու համար։ Ուղղումը ենթադրում է ԶԼՄ-ներում կամ տեղեկատվական ինտերնետային ռեսուրսներում երկրի նախագահին վիրավորելու համար սահմանել 500-1000 մանաթի տուգանք, կամ մինչև 2 տարվա ուղղիչ աշխատանքներ կամ մինչև 2 տարվա ազատազրկում։ Բացի այդ, առաջարկվում է հավելել հատուկ կետ, ըստ որի՝ եթե տվյալ գործողությունը կատարվել է կեղծ օգտատիրոջ անունից, ապա տվյալ դեպքում սահմանել 1000-1500 մանաթ տույժ, կամ էլ մինչև 3 տարվա ազատազրկում։ Բռնատիրության հաստատման ճանապարհին, ինչպես նկատում եք` Ալիևը հաստատուն քայլեր է անում: Սա ոչ թե պետություն է, որտեղ ալիևյան կլանը իշխանություն է ամրապնդում, այլև` իսկական խանություն է հիմնում` դրա համար ապահովելով բոլոր ատրիբուտները` ժողովրդավարության իսպառ վերացում և բռնաճնշումների իրականացում, մինչև օրինակ` Ալիևի պատկերով հեռախոսների արտադրություն... Բայց ամենում ամենաուշագրավն այն է, որ արևմուտքն էլ չի ցանկանում խզել այդ ռեժիմի հետ կապը, Եվրամիության խորհուրդը կողմ է Ադրբեջանի հետ բանակցությունների մեկնարկին Ադրբեջանի հետ «համապարփակ համաձայնագրի» կնքման շուրջ բանակցությունների մեկնարկի մասին որոշումը Եվրամիության խորհուրդը հրապարակեց օրերս Բրյուսելում կայացած հերթական նիստի ընթացքում: «Խորհուրդը Եվրամիության անդամ պետությունների անունից Եվրոպական հանձնաժողովին և Եվրամիության արտաքին հարաբերությունների և անվտանգության քաղաքականության գծով բարձրագույն հանձնակատարին օժտում է Ադրբեջանի հետ համապարփակ համաձայնագրի շուրջ բանակցություններ նախաձեռնելու մանդատով», - նշված է Եվրամիության խորհրդի որոշման մեջ: Այս կառույցի նիստից անմիջապես հետո, սակայն ԵՄ բարձրագույն ներկայացուցիչ Ֆեդերիկա Մոգերինին գերադասեց խոսել ոչ թե Ադրբեջանի հետ բանակցություններ մեկնարկի, այլ ընդհանուր առմամբ «Արևելյան գործընկերություն» ծրագրի շուրջ ստեղծված կացության մասին: «Բոլորիս համար, նաև անձամբ ինձ համար, շատ նշանակալի են այն ազդակները, որ մենք հղում ենք «Արևելյան գործընկերության» ծրագրին: Դրանցով մենք ընդգծում ենք այդ ծրագրի նշանակությունն ինքնին, ինչպես նաև այն հանգամանքը, թե որքան կարևոր են մեզ համար «Արևելյան գործընկերություն» ծրագրին մաս կազմող վեց պետություններից յուրաքանչյուրի հետ ունեցած հարաբերությունները», - հայտարարեց Ֆեդերիկա Մոգերինին: Եվրամիության խորհրդի որոշումը Բաքվում միանշանակ դրական արձագանքի արժանացավ: Դրա հրապարակումից հաշված ժամեր անց Ադրբեջանի արտաքին գործերի նախարարության մամուլի խոսնակ Հիքմեթ Հաջիևը հայտարարեց, որ «պաշտոնական Բաքուն ողջունում է ԵՄ խորհրդի կայացրած որոշումը»: Իսկ փոխարտգործնախարար Մահմուդ Մամեդղուլիևը APA գործակալության հետ զրույցում այսօր նշել է, որ առայժմ հայտնի է միայն Եվրամիության կողմից Բաքվի հետ բանակցություններ սկսելու սկզբունքային որոշման մասին․ - «Մանդատի տրամադրման մասին որոշումը երեկ է կայացվել: Առայժմ որևէ հստակ բան ասելը դժվար է: Կանենք հնարավորը, որպեսզի բանակցությունները մեկնարկեն մոտ ապագայում: Կարևորը, սակայն, ոչ թե բանակցությունների տևողությունն է, այլ դրանց որակը»: Հիշեցնեմ, որ ԵՄ - Ադրբեջանի ապագա համաձայնագիրը փոխարինելու կգա 1996 թվականին Բաքվի և Բրյուսելի միջև կնքված «Գործընկերության և համագործակցության մասին» համաձայնագրին: Ուշագրավ է, որ «Արևելյան գործընկերություն» ծրագրի մեկնարկից ի վեր պաշտոնական Բաքուն խուսափում էր բազմակողմ ձևաչափում համագործակցության ծրագրերին մասնակցելուց` պահանջելով, որպեսզի Եվրամիությունը Ադրբեջանի հետ երկկողմ «Ռազմավարական գործընկերության մասին» համաձայնագիր կնքի: Ավելին, Ադրբեջանի դիվանագիտական գերատեսչությունը մշակել էր այդ համաձայնագրի սեփական տարբերակը, որն արտգործնախարար Էլմար Մամեդյարովը Եվրամիության ներկայացուցիչներին էր փոխանցել 2015թ. մայիսին` «Արևելյան գործընկերության» Ռիգայում կայացած գագաթաժողովի ընթացքում: Ինչ վերաբերում է Եվրամիության մոտեցումներին, ապա Բրյուսելում հույս են հայտնում, որ առաջիկայում կնքվելիք համաձայնագիրը հնարավորություն կտա «դիմակայել այն համատեղ մարտահրավերներին, որոնց բախվում են Ադրբեջանն ու Եվրամիությունը»: «Այս համաձայնագիրը նոր հիմքեր կստեղծի Եվրամիության և Ադրբեջանի միջև քաղաքական երկխոսության և փոխշահավետ համագործակցության համար», - նշված է Եվրոպական միության տարածած պաշտոնական հաղորդագրության մեջ: «Արևելյան գործընկերություն» ծրագրի շուրջ ստեղծված կացությունը օրերս կայացած խորհրդի նիստի օրակարգի առանցքային թեմաներից մեկն է եղել: Այս մասին խոսում էր նաև ԵՄ ընդարձակման բանակցությունների և եվրոպական հարևանության գծով հանձնակատար Յոհանես Հանը, հայտնում է «Ազատությունը»․ «Մենք պետք է շարունակենք այս աշխատանքը, որի մեկնարկը տվել ենք մի քանի տարի առաջ: Մեզ այժմ հաջողվել է որոշակիորեն պարզեցնել գործընթացը` համագործակցության հիմնական չորս ուղղություններ առանձնացնելով: Առաջիկայում հստակ ճանապարհային քարտեզ ի հայտ կգա, որում ընդգրկված կլինեն «Արևելյան գործընկերության» անդամ պետությունների համար առանցքային կարևորություն ունեցող 20 նպատակները, որոնք հարկավոր է լինելու կյանքի կոչել մինչև 2020 թվականը: Այս խնդիրների իրագործման շնորհիվ մեզ կհաջողվի ծրագրի մասնակից պետություններին ընդգրկել եվրոպական տրանսպորտային ցանցում, սերտ հարաբերություններ հաստատել մարդկանց միջև: Այս խնդիրների թվում է, իհարկե, վիզային ռեժիմի ազատականացումը: Ես կարող եմ միայն կրկնել, որ Վրաստանն ու Ուկրաինան արդեն իսկ կատարել են իրենց ներկայացված բոլոր նախապայմանները, և ես ակնկալում եմ, որ շատ շուտով դրական որոշում կլինի», նշել է ԵՄ ընդարձակման գծով հանձնակատարը: Մետաքսյա Շալունց