Բա ու՞ր էիք այդ 20 տարին, ինչու՞ ոչինչ չէր արվում. Անահիտ Բախշյան
Երևանի ավագանու «Բարև Երևան» խմբակցության անդամ Անահիտ Բախշյանը Հայելի ակումբում հայտնեց, որ 1000 դրամների ֆոնդի նախագծի նկատմամբ ժողովրդի անվստահությունը գալիս է նույն նպատակով դեռեւս 2002 թվականին բացված՝ «Մարտիկ» հիմնադրամի գործունեությունից: Անահիտ Բախշյանը կարծում է, որ ապրիլյան պատերազմից հետո բոլորիս գլխին սառույցով ջուր լցվեց, եւ իշխանությունները հասկացան, որ բանակում ամեն բան այնպես չէ. «Արցախի կառավարության հրավերով՝ հուլիսին ես եղա Արցախում, անձամբ այցելեցի սահման: Այնտեղ ասում էին՝ ինչ որ չի արվել այս 20 տարիների ընթացքում, արվեց 5 ամսվա ընթացքում: Բա ու՞ր էիք այդ 20 տարին, ինչու՞ ոչինչ չէր արվում»,-հարց ուղղեց նա ասուլիսին ներկա ԱԺ ՀՀԿ-ական պատգամավոր Սուքիաս Ավետիսյանին: Վերջինս խնդրեց 1000 դրամների նախագիծը չկապել «Մարտիկ» հիմնադրամի գործունեության հետ: Պատգամավորը կարծում է, որ սխալ է տարբերակված մոտեցում ցուցաբերել սոցիալապես ապահով կամ անապահով աշխատողների միջեւ. «Իզուր են ասում՝ շատ ունեցողը թող շատ տա, քիչ ունեցողը չտա կամ քիչ տա: Այս հազար դրամը չպետք է կապ ունենա մարդու գրպանի պարունակության հետ, այլ լինի յուրաքանչյուրի վերաբերմունքը բանակի նկատմամբ, որը պետք է լինի հավասար»:
Հետևեք մեզ Viber-ում
