Ռուսաստանն այս փաստաթղթով Հայաստանին ներքաշում է խնդիրների մեջ. Քոքոբելյան
Ազատ դեմոկրատներ կուսակցության ղեկավար, ԱԺ պատգամավոր Խաչատուր Քոքոբելյանը, խորհրդարանում լրագրողների հետ զրույցում անդրադառնալով ՀՀ-ՌԴ զորքերի միացյալ խմբավորում ստեղծելու համաձայնագրին հայտարարեց, թե ամենայն պատասխանատվությամբ ուզում է ասել, որ ՊՆ-ն որևիցե հստակ բացատրություն չի տվել, թե ինչ գործառույթներ է իրականացնելու այդ ստորաբաժանումը: Ըստ նրա առաջին հայացքից հստակ գրված չէ մինչ այս պահը, թե ինչ է իրենից ներկայացնելու այդ համաձայնագրով ստեղծվող ստորաբաժանման գործառույթը: «ՌԴ նախագահի հրամանագրից կարծես թե ինչ-որ բան երևում է, այսինքն՝ երկու պետություններին սպառնացող Կովկասյան տարածաշրջանում արտաքին վտանգի մասին է դա: Ամենայն պատասխանատվությամբ ուզում եմ ասել, որ ՊՆ-ն որևիցե հստակ բացատրություն չի տվել, թե ինչ գործառույթներ է իրականացնելու այդ ստորաբաժանումը: Պարզ երևում է, որ հայկական կողմում չկա հստակ պատկերացում՝ ինչպիսի՞ գործառույթներ դրան կվերագրվեն ռուսական կողմից: Ե՞րբ ծնվեց այս գաղափարը, երբ կար խնդիր նաև Ռուսաստանի և Թուրքիայի միջև»,- լրագրողներին իր մտահոգությունը փոխանցեց Քոքոբելյանը: Վերջինս կարծում է, որ կովկասյան տարածաշրջանում Հայաստանն ունի հստակ սպառնալիքներ: Նա մատնանշեց, որ հայ-ադրբեջանակն սահմանային լարված իրավիճակների ժամանակ հասցեական հայտարարություններ չեն լինում, այդ թվում նաև մեր ռազմավարական դաշնակցի կողմից: Քոքոբելյանը ՀԱՊԿ-ի հայտարարությունները լղոզած է որակում: «Խոսքս նորմալ հասցեական հայտարարության մասին է, ոչ թե ՀԱՊԿ-ի լղոզած հայտարարությունների, պետք են հստակ հայտարարություններ, որոնցով ցույց կտրվեն, որ Հայաստանի նկատմամբ ագրեսիա է իրականացվում: Եթե ռուսական կողմն իսկապես այդքան մտահոգ է հայկական կողմի մարտահրավերներով և ամենամեծ՝ ադրբեջանական ագրեսիայով, ապա առնվազն մինչև այս պահը պետք է դադարեցրած լիներ զենքի մատակարարումը Ադրբեջանին: «Վրաստանը Հայաստանի համար համարվում է բարեկամական պետություն, այսինքն՝ այսպիսի գործարքով, այսպիսի ստորաբաժանումների ստեղծումով բերելու է հայկական արտաքին վտանգին, այսօրվա վտանգն արդեն կա, և ես այն կարծիքին չեմ, որ մենք սպառնալիք ունենք Վրաստանից: Ռուսաստանն այս փաստաթղթով Հայաստանին ներքաշում է խնդիրների մեջ, ինչպիսիք ինքն ունի տարածաշրջանում: Աստված չտա վրաց-ռուսական նոր ռազմական ընդհարումներ, այդ դեպքում ռուսական կողմն արդարացիորեն կարող է պահանջել, որ Հայաստանն իր մասնակցությունն ունենա: Անկախ ամեն ինչից, այս պայմանագիրն արդեն վավերացվում է հանրության ոչ լայն շրջանակների տեղեկացմամբ, նույնիսկ ԱԺ-ում լայն քննարկման չի արժանացել»,- ընդգծեց պատգամավորը: Քոքոբելյանն ասաց, թե համաձայնագրի վավերացումից հետո էլ պետք է հետևողական լինել և պահանջել, որ ստեղծվելիք ստորաբաժանումները կանխարգելեն նաև ադրբեջանական ագրեսիան: «ՌԴ-ն սրանով հերթական անգամ պաշտոնապես փորձում է ներքաշել իր ընդհանուր խնդիրների մեջ»,- շարունակեց Խաչատուր Քոքոբելյանը: Հիշեցնենք, որ Ռուսաստանի նախագահ Վլադիմիր Պուտինը ստորագրել է Կովկասյան տարածաշրջանում Հայաստանի և Ռուսաստանի զորքերի միացյալ խմբավորում ստեղծելու մասին համաձայնագիրը: Փայլակ Ֆահրադյան
Հետևեք մեզ Viber-ում
