Համազգային հանգանակություն՝ հանուն Արթուր Գեւորգյանի
Աժ պատգամավոր Արթուր Գևորգյանին շատերը ճանաչում են որպես ՀՀ Ոստիկանապետ Վլադիմիր Գասպարյանի փեսա, ու ավելի քչերը գիտեն, որ նա արցախյան պատերազմի զոհված հերոսներից մեկի՝ Մարտական խաչ շքանշանի ասպետ Սամվել Գևորգյանի որդին է, ՀՀ Բռնցքամարտի ֆեդերացիայի նախագահը, իսկ երիտասարդ տարիներին ներկայացրել է մեր երկիրն Ատլանտայում կայացած ամառային Օլիմպիական խաղերում։ Ու քանի որ, քչերին է բախտ վիճակված լինել ազդեցիկ մարդու՝ ոստիկանապետի փեսան, ապա լովին արդարացված են սույն անձնավորության հայտարարությունները, թե իրեն նախանձում են շատերը, ու այդ պատճառով էլ իր մասին փիս-փիս պատմություններ են հնարում: Բռնցքամարտիկ պատգամավորը համոզված է նաեւ՝ մարդիկ ուղղակի նախանձում են իրեն, քանի որ ինքը 20 տարի մեծ սպորտում է եղել, ստացել մեծ գումարներ։ Գեւորգյանը այս անկեղծ հայտարարությունն արել է, երբ լրագրողները նրանից հետաքրքրվել են ԱՄՆ-ում իր շքեղ առանձնատների մասին, որոնց վերաբերյալ մամուլում հրապարակումներ են եղել: Բայց պարզվում է, որ իրավիճակը փոխվել է, երբ Գեւորգյանը դարձել է պաշտոնյա՝ սկզբում Դավիթաշեն համայնքի ղեկավար, ապա՝ պատգամավոր. «Իմ գումարները գնալով նվազել են այն օրվանից, երբ ես պաշտոնի եմ եղել ՀՀ-ում, քանի որ ղեկավարում եմ Բռնցքամարտի ֆեդերացիան, կամա թե ակամ հսկայական ծախսեր են առաջանում՝ բռնցքամարտիկներին ճիշտ ճանապարհին դնելու համար»,- ասել է նա ու ժխտել օվկիանոսից այն կողմ դղյակներ ունենալու փաստը. «Փաստաթղթեր կարող եմ տալ բազմաթիվ, որ 38 Արթուր Գեւորգյան անունով տուն կա ԱՄՆ-ում։ Եթե իմն են, ես ձեզ հյուր եմ հրավիրում։ Միգուցե հուշեք այդ մարդկանց գնան այդ հասցեով, միգուցե Գեւորգյան Արթուրը տանը լինի»,- ասել է նա։ Հուսանք, որ Արթուր Գեւորգյանի <<լացը>> կարեկցանք կառաջացնի խիղճ ունեցողների մոտ ու մարդիկ կլծվեն պատգամավորի համար հանգանակություններ անելու մարդասիրական գործին, մարդ, ով հայկական սպորտի համար իր ընտանիքի բերանից հացը կտրել ու ներդրել է բռնցքամարտի զարգացման նվիրյալ գործին ու չի օգտագործում իր ազդեցիկ կապերը ու իր ավտոլվացման կետերում չեն սպասարկվում պաշտոնյանների մեքենաները,առավել եւս այդ ծառայությունների դիմաց շուկայականից բարձր գումարներ չեն գանձվում, կնախաձեռնեն համահայկական դրամահավաք:
Մանավանդ որ երիտասարդն այս Հանրապետական անթույլատրելի է համարում հարուստ մարդկանց դեմ պայքարը ու հորդորում լրագրողական համայնքին քարոզել լավի, հարստության ու բարեկեցության օգտին. <<Դուք եք ստեղծում հասարակության մեջ մի կարծիք, որ գեղեցիկը, հաջողակը, հարուստը դիտվում է վատ: Լրագրողներն են հիմնականում ստեղծում նման մթնոլորտ, և թացը չորից սկսում է չտարբերվել: Ես համաձայն եմ, որ երկրում կան մի շարք պաշտոնյաներ, որ հարստացել են ոչ ճիշտ ճանապարհով, դրանով թող զբաղվեն պատկան մարմինները: Բայց նորմալ է, երբ հասարակության մեջ լինեն հաջողակներ, հարուստ մարդիկ, և պետք չէ չարությամբ լցվել նրանց նկատմամբ» փորձել է օրիգինալ գտնվել մեր նորաթուխ պաշտոնյան՝ անհաղորդ մնալով հայտնի ասույթին, որ անբարո է աղքատ երկրում հարուստ լինելը:
Նա, այնուամենայնիվ, օրիգինալ է գտնվել ու այս անգամ բավարարվել է լրագրողներին մերկապարանոց մեղադրանքներ վերագրելով ու նրանց <<սատկեցնելու>> անհրաժեշտություն չէր տեսել, ինչպես ամիսներ առաջ <<Հրապարակ>> օրաթերթի հետ զրույցում, երբ վերլուծելով ՊՊԾ գնդի հետ կապված միջադեպը լրագրողների մասին կարծիք էր հայտնել, թե նորմալ երկրում տվյալ իրավիճակում լրագրողներին կսատկեցնեին…
Անկախ ամեն ինչից Արթուր Գեւորգյանը այն եզակի ՀՀԿ-ականներից է, եթե ոչ միակը, որը առավել քան անկեղծ է հանրության առջեւ:Նա պատգամավոր է ընտրվել մեծամասնական ընտրակարգով եւ հույս ունի նույն կերպ ընտրվել նաեւ հաջորդ ընտրություններում։ Երբ նրան հիշեցրել են, որ նոր Սահմանադրությամբ մեծամասնական ընտրակարգ չկա, նա հակադարձել է. «Դուք ուսումնասիրեք այդ համակարգը եւ կհասկանաք, որ դա ավելի շատ մեծամասնական է, քան համամասնական։ Երբ քո անվան դիմաց են քվեարկում, դա ինչ է, եթե ոչ մեծամասնական ընտրակարգ»։
Այնինչ ՀՀԿ-ականները ԸՕ փոփոխությունների ընթացքում ամիսներ շարունակ կուրծք էին ծեծում ու հակադարձում ընդդիմադիրներին, որ ռեյտինգային քվեարկությունը մեծամասնական ընտրակարգը չէ:
Անի Սահակյան
Հետևեք մեզ Viber-ում
