18 մանդատները չեն ճանաչում Ասլանյանի քաղաքապետ լինելու հանգամանքը, հետևաբար նա պետք է հրաժարական տա. Մարուքյան
«Լուսավոր Հայաստան» կուսակցության նախագահ, ԱԺ պատգամավոր Էդմոն Մարուքյանն այսօր ԱԺ-ում լրագրողների հետ զրույցում անդրադարձավ վանաձորյան ընտրություններից հետո ձևավորված իրավիճակի մասին: Խոսելով մամուլի հրապարակումների մասին, թե ՀՀԿ-ականները ցանկանում են Վանձորում, ի աջակցություն Մամիկոն Ասլանյանի ինքնաբուխ հավաք կազմակերպել՝ Մարուքյանը պատասխանեց, որ հետաքրքիր արձանագրում կարող է լինել այդ ցույցից հետո: «Սահամանդրությամբ յուրաքանչյուր ոք իրավունք ունի խաղաղ ցույցերի ու երթերի անցկացման»,- նշեց Էդմոն Մարուքյանը: Դիտարկմանը, թե Մամիկոն Ասլանյանը Վանաձորում մի քանի քաղաքական ուժերի հետ հանդիպումներ է ունեցել ու քննարկել քաղաքում ստեղծված իրավիճակը և հարցին՝Դուք այս ընթացքում հանդիպե՞լ եք Ասլանյանի հետ, Մարուքյանը պատասխանեց. «Ես որևէ տեղեկություն չունեմ, չգիտեմ՝ ինչի մասին է խոսքը: Ես՝ ինքս, կամ մեր կուսակցության մեկ այլ ներկայացուցիչ չի հանդիպել պարոն Ասլանյանի հետ: Այս դեպքի համար կա շատ պարզ մի ինդիկատոր: Այն է, որ եթե ունեն մեծամասնություն, ապա կարող են քաղաքը կառավարել, նիստեր գումարել, որոշումներ ընդունել, եթե չունեն մեծամասնություն, հետևաբար պետք է հրաժարական ներկայացնեն: Մեր դիրքորոշման մեջ որևէ բան չի փոխվել»: Արձագանքելով դիտարկմանը, թե Հայկական Վերածնունդ կուսակցության ղեկավար Արթուր Բաղդասարյանն օրեր առաջ հայտարարություն էր տարածել, որտեղ առաջարկել էր Վանաձորում հարցումներ իրականացնել՝ պարզելու՝ ինչպե՞ս է ժողովուրդը տրամադրված և ի՞նչ քայլեր կարող են ձեռնարկել խնդրի լուծման համար և հարցին՝կարիքը տեսնո՞ւմ եք այդ հարցումների, պատգամավորը պատասխանեց. «Ես կարծում եմ, որ դրա իմաստը չկա, որովհետև այդ հարցը շատ պարզ է: Գոյություն ունի մանդատների միություն՝ երեք կուսակցությունների դաշինքով, որոնք որ բոյկոտել են ավագանու առաջին նիստը, հետևաբար իշխող կուսակցությունը չունի մեծամասնություն: էլ ի՞նչ հարցում անեն: 18 մանդատները չեն ճանաչում Ասլանյանի քաղաքապետ լինելու հանգամանքը, հետևաբար նա պետք է հրաժարական տա: Կամ եթե երեք ամիս նիստ չլինի, ապա Վանաձորում նոր ընտրություններ կլինեն: Դա գաղափար է ուղղակի, որ դրվել է շրջանառության մեջ, ինչի հետ եթե համաձայն լինեիք, ապա վաղուց էինք այդպես արել»:
Հետևեք մեզ Viber-ում
