Վարկանիշը սոցիալ հոգեբանական երևույթ է.Շարմազանովը արձագանքեց Արմեն Ռուստամյանին
«Վարկանիշը սոցիալ հոգեբանական երեևույթ է, որ տարբեր մարդիկ վարկանիշների վերաբերյալ կարող են ունենալ տարբեր կարծիքներ: Բնականաբար, իմ հարգարժան գործընկերոջ վարկանշանային գնահատականի հետ համամիտ չեմ: Այն կարծիքի էլ չեմ, որ բոլորի ուշքը գնում ա իշխանության համար, բայց միեւնույն ժամանակ բոլորի ուշքը չի գնում ընդդիմության համար: Եվ այդ իմաստով մեր երկրում կան խնդիրներ եւ Հանրապետականը չի գնում պրիմիտիվ խնդիրներ լուծելու, չի գնում պրիմիտիվ եզրույթներ օգտագործելու, կամ ասելու: Այսինքն՝ զգացմունքային չի խնդիր , խնդիրը խորքային է, եւ Հանրապետականը իր սկզբնավորման առաջին իսկ օրվանից մշտապես առաջնորդվել է պետության գերակայությամբ»,-անդրադառնալով Արմեն Ռուստամյանի այն հայտարարությանը, թե ՀՅԴ վարկանիշը իջնում է իշխանությունների հետ համագործակցության ժամանակ, ասաց ԱԺ փոխնախագահ Էդուարդ Շարմազանովը: « Միշտ ստացվել է, միշտ չի ստացվել, դա այլ հարց է, բայց որ Հայաստանի հանրապետական կուսակցությունը մշտապես ունեցել է նպատակ ծառայելու հայրենիքին, ծառայելու պետությանը, քաղաքացուն, դա փաստ է: Բնականաբար, եղել են նաեւ թերություններ, բայց այն որ Հայաստանի Հանրապետական կուսակցությունը այսօր էլ Հայաստանի քաղաքական դաշտի ամենաազդեցիկ ամենավարկանշային, կներեք, եւ ամենամեծ ռեսուրսն ունեցող քաղաքական ուժն է, իր բոլոր թերություններով հանդերձ, սա փաստ է»,-նկատեց ԱԺ փոխնախագահը հավելելով, որ այս հարցում տարբեր քաղաքական ուժեր կարող են ունենալ տարբեր կարծիքներ: «Բայց այն, որ Դաշնակցության իմ բարեկամը կարող է ունենալ մի կարծիք, ես էլ կարող եմ ունենալ մեկ այլ կարծիք քաղաքական ուժերի վերաբերյալ, բայց ես գերադասում եմ այդ կարծիքը պահել ինձ: Իսկ ինչ վերաբերվում է Հանրապետականին, ապա ի լուր բոլորին պետք է ասեմ՝ ուզեն մեր գործընկերները, թե չուզեն, ես չեմ ասում Հանրապետականի համար ժողովրդի ուշքը գնում է, աննորմալ էլ կլինի, որ ես այդպիսի բան ասեմ, բայց այն, որ իր բոլոր թերություններով հանդերձ Հանրապետականը ամենակայացած, ամենակայուն, ամենակուռ եւ ամենաազդեցիկ քաղաքական ուժն է, սա փաստ է»,-ընդգծեց Շարմազանովը : Էդուարդ Շարմազանովը գտնում է, որ ամեն բան խոսքով արտահայտելը հեշտ է. «Հիմա ասելով չէ, 2017 թվականին կտեսնենք՝ ով ինչքան վարկանիշ ունի՝ ե՛ւ Դաշնակցույթունը, ե՛ւ Հանրապետական կուսակցությունը, ե՛ւ ՀԱԿ-ը, ե՛ւ Օրինաց երկիրը, ե՛ւ Բարգավաճ Հայաստանը, ե՛ւ նոր ստեղծվող կուսակցությունները, կապրենք կտեսնենք: Ես այլեւս այդքան երիտասարդ չեմ եւ քաղաքկանության մեջ փորձված եմ, որպեսզի այդ խայծը կուլ չտամ: Ես իմ բոլոր գործընկերներին, այդ թվում նաեւ իմ սիրելի, իմ հարգելի դաշնակցական Արմեն Ռուստամյանին կհորդորեմ երբեք զգացմունքային եզրույթներ չօգտագործել, որովհետեւ զգացմունքային եզրույթները այդքան էլ օբյեկտիվ չեն: Ես իրեն այդպես չեմ պատասխանի, բայց ես կասեմ, որ Հանրապետականը ունի վարկանիշ, Հանրապետականը ունի անելիք եւ Հանրապետականը պատրաստ է համագործակցելու»,-եզրափակեց Շարմազանովը: Աստղիկ Ավագյան
Հետևեք մեզ Viber-ում
