Գագիկ Խաչատրյանը կարող է գնել իր կառուցած ուսումնական կենտրոնը

Կառավարության վերջին նիստում ՊԵԿ նախագահ Վարդան Հարությունյանը կառավարությանը խնդրել է Դիլիջանի ուսումնական կենտրոնը ՊԵԿ ենթակայությունից փոխանցել կառավարությանն առընթեր պետական գույքի կառավարման վարչությանը: Համաձայն կառավարության նիստի օրակարգում ներկայացված հիմնավորման՝ ներկայումս աննպատակահարմար է Պետական եկամուտների կոմիտեի կողմից Դիլիջանի ուսումնական կենտրոնի շահագործումը։ Հիմնավորման մեջ նաև ներկայացվել է, որ նախատեսվում է օբյեկտն ամրացնել ՀՀ ԿԱ պետական գույքի կառավարման վարչությանը` հետագայում այն օգտագործման իրավունքով այլ անձի հանձնելու պայմանով: Այսինքն՝ ուսումնական կենտրոնը ժամանակավոր է հանձնվում պետական գույքի կառավարման վարչությանը։ Սակայն, նախագծում հստակ չի նշվում՝ հետագայում այն հանձնվելու է այլ պետական մարմնի՞, թե՞ հանվելու է աճուրդի։ Հիշեցնենք, որ այս կենտրոնի կառուցումը սկսվել էր ՊԵԿ նախկին ղեկավար Գագիկ Խաչատրյանի պաշտոնավարման տարիներին: 2011-2016 թվականների ընթացքում Դիլիջանի ուսումնական կենտրոնի վերակառուցման աշխատանքների, ինչպես նաև ձեռք բերված գույքի և վարչական սարքավորումների համար պետական բյուջեից ծախսվել է մոտ 16 միլիարդ դրամ: Մամուլում  հատկապես լայն արձագանք էր ստացել ուսումնական կենտրոնի գերթանկարժեք կահավորումը՝  250 մլն դրամով գնված կահույքը, «լյուքս» դասի հյուրանոցներին վայել հանդերձավորված լոգասենյակները` 37 մլն դրամի օճառամաններով, հայելիներով ու աղբամաններով, 41 մլն դրամ արժողությամբ խոհանոցային սպասքը և այլն: Կարեն Կարապետյանը հայտարարել է, որ մտադիր է  ֆոնդային բորսան աշխուժացնել:Այս համատեքստում վարչապետը  պետական գույքի կառավարման վարչության պետ Արաման Սահակյանին հանձնարարել է երկշաբաթյա ժամկետում ներկայացնել առաջարկներ մասնավորեցման ցուցակում չգտնվող պետական ընկերությունների մասնավորեցման վերաբերյալ՝ ֆոնդային բորսայում հրապարակային առաջարկների միջոցով: Արդյոք այս ցուցակում տեղ կգտնի նաև  Դիլիջանի ուսումնական կենտրոնը,  դժվար է ասել: Տեղեկություններ կան, որ կառավարությունը մտադիր է Դիլիջանի կենտրոնի վրա պետական բյուջեից  ծախսված գումարները ետ վերադարձնել: Հսկայական տարածքներ զբաղեղնող շինությունը, որը   կառուցվելուց հետո փաստացի չի շահագործվել, աճուրդի դրվելու պարագայում, հնարավոր է չվաճառվի  այն գնով, որը  կփոխհատուցի կատարված ծախսերը: Փաստացի կենտրոնի  կառուցման վրա ավելի քան 34 մլն դոլար է ծախսվել ՝ տարածքի գինը չհաշված: Եթե տարածքն էլ հաշվվի կադաստրային արժեքով, ապա կստացվի բավականին թանկարժեք գույք, որի գնորդը Հայաստանում այդպես էլ կարող է չհայտնվել: Հասկանալի պատճառներով նախկին նախարար Գագիկ Խաչատրյանը կենտրոնի շինարարական ծախսերը ուռճացված է  ներկայացրել: Ուստի,  այժմ, եթե  աճուրդով ծախսված փողը ետ բերել հնրավոր չլինի, կարառավարությունը կարող է հանգիստ առաջարկել պարոն Խաչատրյանին գնել իր  իսկ կառուցած ուսումնական կենտրոնը՝ ծախսված գումարին համարժեք գնով: Դավիթ Մանուկյան