Միլիցա Մարկովիչը բացարձակ անտեղյակ է ԼՂՀ գտնվելու վայրից

Եվրախորհրդի խորհրդարանական վեհաժողովի բոսնիացի պատվիրակ Միլիցա Մարկովիչի փաստարկները, թե հայկական կողմը խոչընդոտել է իր այցը Լեռնային Ղարաբաղ, բացարձակ սուտ են:

Այս մասին լրագրողների հետ հանդիպմանը հայտարարեց ԵԽԽՎ հայաստանյան պատվիրակության անդամ, ԲՀԿ խմբակցության ղեկավար Նաիրա Զոհրաբյանը: «Արմենպրես»-ի հաղորդմամբ` հարցին ի պատասխան, թե արդյոք հայկական կողմը դիմել է հակահայկական զեկույցի հեղինակին այցելելու Հայաստան ու Լեռնային Ղարաբաղ, Նաիրա Զոհրաբյանը պատասխանեց. «Հարգարժան տիկնոջը ոչ միայն դիմել ենք, այլև տարբեր ձևաչափերով, տարբեր հարթակներում հանդիպել ենք նրան, հրավիրել Լեռնային Ղարաբաղի Հանրապետություն` իր ցանկացած ընդունելի պայմաններով, սակայն նա տարբեր պատճառներով հրաժարվել է: Կա նրա հետ ինտերնետային նավակագրություն, որը մենք կարող ենք տրամադրել, ինչը վկայում է այն մասին, որ տիկինը հակված չէր ադեկվատ պատճառաբանություն լսելու և գալու»:

Նաիրա Զոհրաբյանի խոսքով` նիստից առաջ, կրկին հանդիպել են նրան, փաստարկներ ներկայացրել, որ ԵԽԽՎ կանոնակարգը խախտվել է, որ ինքը պետք է լիներ ԼՂՀ-ում, սակայն Մարկովիչը նույն անվրդով տեսքով լսել է ու ասել, որ ինքը միևնույն է զեկույցը պաշտպանելու է: Պատվիրակության մեկ այլ անդամի` Նաիրա Կարապետյանի դիտարկմամբ էլ` Միլիցա Մարկովիչն այնքան անտեղյակ է եղել Լեռնային Ղարաբաղի գտնվելու վայրից, որ հարցրել է, թե արդյոք կարող է Զվարթնոց օդանավակայանից մեկ ժամում մեքենայով հասնել Սարսանգի ջրամաբար: ԵԽԽՎ հայաստանյան պատվիրակության ղեկավար Հերմինե Նաղդալյանն էլ նշեց, որ Սարսանգի ջրամբարի վերաբերյալ զեկույցն ավելի շատ քաղաքական հարցեր բարձրացնելու նպատակ ուներ, քան խոսելու ադրբեջանցի գյուղացիներին ջրով ապահովելու մասին: